კრიპტოვალუტა Sahara AI (SAHARA) ბაზარზე მძიმე დღეებს გადის. ტოკენის ფასმა ბოლო 24 საათის განმავლობაში 60%-იანი ვარდნა განიცადა და დაახლოებით 0.016 დოლარამდე ჩამოვიდა, რაც მის ისტორიულ მინიმუმთან ახლოსაა.

რა მოხდა ბაზარზე?

ვარდნა საკმაოდ სწრაფი იყო — დღის განმავლობაში ტოკენი 0.035 დოლარიდან 0.016 დოლარამდე დაეცა. მონაცემების მიხედვით, 24 საათის განმავლობაში 215 მილიონი დოლარის მოცულობის ტრანზაქცია განხორციელდა, რაც ტოკენის 49-მილიონიანი საბაზრო კაპიტალიზაციის ფონზე უჩვეულოდ მაღალი მაჩვენებელია.

ბაზრის დამკვირვებლები ამ მოვლენას „კაპიტულაციის“ ნიშნად აფასებენ. ფასის ვარდნის პარალელურად, სოციალურ ქსელ X-ზე გავრცელდა ინფორმაცია, რომლის მიხედვითაც, დიდი რაოდენობით ტოკენების გადაადგილება ფასზე ნეგატიურად აისახა.

გუნდის პოზიცია და განმარტებები

Sahara AI-ის გუნდმა ოფიციალური განცხადება გაავრცელა, სადაც ნათქვამია, რომ პროტოკოლის კონტრაქტებსა და პროდუქტებში უსაფრთხოების არანაირი ხარვეზი არ დაფიქსირებულა. კომპანიის მტკიცებით, გუნდისა და ინვესტორების კუთვნილი ტოკენები უცვლელია და მათ არცერთი აქტივი არ გაუყიდიათ.

„ტრანსფერები, რომლებიც ფასის ცვლილების მიზეზად დასახელდა, წინასწარ დაგეგმილი ოპერაცია იყო. ჩვენ შევავსეთ Chainlink CCIP ხიდის კონტრაქტი, რათა ლიკვიდობა მიგვეწოდებინა ჩვენი ახალი კროს-ჩეინ ხიდისთვის“, — აცხადებენ Sahara AI-ში.

კომპანიის განმარტებით, აღნიშნული ინფრასტრუქტურა ტოკენების ბლოკჩეინებს შორის გადასატანად გამოიყენება. თუმცა, მიუხედავად ამ განმარტებებისა, ინვესტორების ნდობა შეირყა, განსაკუთრებით იმ ფონზე, რომ 2025 წლის ივნისში გაშვების შემდეგ, SAHARA-მ თავისი ღირებულების დაახლოებით 75% უკვე დაკარგა.

საინტერესოა, რომ გუნდმა მსგავსი შინაარსის განცხადება 2025 წლის ნოემბერშიც გაავრცელა, როდესაც ტოკენის ფასი 7 ცენტიდან 4 ცენტამდე შემცირდა. ამჯერად, ბაზარი ფასის ვარდნაზე კიდევ უფრო მძაფრად რეაგირებს.