აშშ-ის ეკონომიკა მორიგი გამოწვევის წინაშეა. ოთხშაბათს დილით გამოქვეყნებული მაისის ინფლაციის მონაცემები, სავარაუდოდ, ბოლო წლების ერთ-ერთ ყველაზე მაღალ მაჩვენებელს დააფიქსირებს. უოლ სტრიტის კონსენსუსის მიხედვით, სამომხმარებლო ფასების ინდექსი (CPI) წლიურ 4.2%-იან ზრდას აჩვენებს, რაც თვიურ ჭრილში 0.5%-იან მატებას გულისხმობს.

თუ პროგნოზი გამართლდა, ეს იქნება პირველი შემთხვევა 2023 წლის მაისის შემდეგ, როდესაც ინფლაცია 4%-იან ზღვარს გადალახავს. შედარებისთვის, გასული წლის ანალოგიურ პერიოდში ინფლაციის დონე 2.4%-ს შეადგენდა, აპრილში კი 3.8% იყო.

რა იწვევს ფასების ზრდას?

ეკონომიკური ზრდის ტემპის აჩქარების მთავარ მიზეზად ირანის ომის ფონზე ენერგომატარებლების გაძვირება სახელდება. თუმცა, პრობლემა მხოლოდ ენერგეტიკით არ შემოიფარგლება. Dow Jones-ის მონაცემებით, „ბირთვული ინფლაცია“, რომელიც კვებისა და ენერგიის ხარჯებს არ მოიცავს, წლიურ 2.9%-იან ნიშნულს მიაღწევს.

„ეს არ არის მხოლოდ ნავთობის ამბავი. ეს არის ფულის მიწოდებისა და სულ უფრო მეტად – ხელოვნური ინტელექტის გავლენის ამბავიც,“ – აცხადებს Charles Schwab-ის მთავარი საინვესტიციო სტრატეგი ლიზ ენ სონდერსი.

ექსპერტები შიშობენ, რომ ინფლაციური პროცესები ფართოვდება. ნავთობის ფასების ზრდამ უკვე დაიწყო გავრცელება ეკონომიკის სხვა სექტორებზეც, რაც ამყარებს მოლოდინს, რომ ფასების ზრდა უახლოეს პერიოდში არ შენელდება.

პოლიტიკური და ეკონომიკური მოლოდინები

ტრამპის ადმინისტრაცია იმედოვნებს, რომ ახლო აღმოსავლეთში კონფლიქტის დარეგულირებისთანავე ინფლაცია კლებას დაიწყებს. თუმცა, ანალიტიკოსები სიფრთხილისკენ მოუწოდებენ. ლიზ ენ სონდერსის თქმით, საწარმოო ჯაჭვებზე მიყენებული ზიანი იმდენად დიდია, რომ ომის დასრულების შემთხვევაშიც კი, ნავთობის ფასები ძველ ნიშნულებს სწრაფად ვერ დაუბრუნდება.

ინვესტორები ამ სიახლეებს შეშფოთებით ხვდებიან. საფონდო ბირჟა მგრძნობიარეა მონაცემების მიმართ და მოლოდინზე უარესი შედეგები შესაძლოა ბაზარზე ნეგატიურად აისახოს. შრომის სტატისტიკის ბიურო ოფიციალურ ანგარიშს ოთხშაბათს, 8:30 საათზე (ET) გამოაქვეყნებს.