აშშ-ის სახელმწიფო მდივნის მარკო რუბიოს განცხადებამ, რომ ვაშინგტონმა საქართველოს ხელისუფლებისთვის ურთიერთობების გაუმჯობესების პირობები უკვე განსაზღვრა, პოლიტიკურ სპექტრში სხვადასხვა ინტერპრეტაცია გამოიწვია. პრემიერ-მინისტრმა ირაკლი კობახიძემ აღნიშნულს „სუვერენიტეტის პატივისცემის“ კონტექსტში უპასუხა.
აშშ-ის ინტერესები რეგიონში
ანალიტიკოს დავით ზურაბიშვილის შეფასებით, აშშ-ის პოლიტიკა რეგიონში მკაფიოა და ის პირდაპირ უკავშირდება გეოპოლიტიკურ ინტერესებს. მისი თქმით, ვაშინგტონის მთავარი საზრუნავი სამხრეთ კავკასიაში ჩინეთისა და ირანის გავლენის გაფართოების შეკავებაა.
„ერთადერთი, რაც მარკო რუბიოს განცხადებებშიც ჩანდა და ტრამპის მოსვლის შემდეგ ამერიკის პოლიტიკასთანაც უნისონშია, არის ის, რომ ამ რეგიონში ჩინეთისა და ირანის გავლენა არ უნდათ,“ — აცხადებს ზურაბიშვილი.
ხელისუფლებისა და ოპოზიციის გამოწვევები
ზურაბიშვილი მიიჩნევს, რომ არც ხელისუფლება და არც ოპოზიცია არ არიან მზად რეალური ცვლილებებისთვის. მისი აზრით, „ქართული ოცნების“ მხრიდან ამერიკასთან ურთიერთობების დალაგების მოლოდინი არარეალურია, რადგან მხარეები დემოკრატიულ რეფორმებზე, ადამიანის უფლებებსა და პოლიტპატიმრების საკითხზე საჯაროდ თითქმის არ საუბრობენ.
რაც შეეხება ოპოზიციას, ანალიტიკოსი ხაზს უსვამს, რომ მათთვის მთავარი გზავნილი არჩევნების ბოიკოტის დაუშვებლობაა. „არჩევნების ბოიკოტი ამერიკელებისთვისაც, ევროპელებისთვისაც და ზოგადად ყველასთვის გაუგებარია,“ — აღნიშნავს ის.
ოპოზიციის სტრატეგიული ჩიხი
დავით ზურაბიშვილი მიიჩნევს, რომ ოპოზიციის ტაქტიკა, რომელიც ბიძინა ივანიშვილის დანებებას არჩევნებში მონაწილეობის წინაპირობად აყენებს, მცდარია. მისი თქმით, ასეთი მიდგომა ხელისუფლებას არაფრის დათმობის სტიმულს არ აძლევს.
„თუ ეტყვიან, რომ არჩევნებზე არ წავლენ, ხელისუფლება არაფერს დათმობს. მისთვის ძალიან მნიშვნელოვანია, რომ 2028 წლის შემდეგ ყველაფერი მის ხელში აღმოჩნდეს,“ — ამბობს ანალიტიკოსი.
საბოლოო ჯამში, ზურაბიშვილის შეფასებით, ამერიკული მხარის განცხადებები ჯერჯერობით არ შეიცავს კონკრეტულ ზეწოლას ან მკაფიო სამოქმედო გეგმას, რაც სიტუაციას გაურკვეველს ხდის.
დისკუსია
0 კომენტარი
ჯერ კომენტარი არ არის — იყავი პირველი.