პარტია „გახარია საქართველოსთვის“ წევრი გიორგი შარაშიძე მიიჩნევს, რომ აშშ-ის წარმომადგენელთა პალატის მიერ მიღებული საკანონმდებლო აქტი საქართველოს მიმართ ამერიკის შეერთებული შტატების ურყევი მხარდაჭერის კიდევ ერთი მკაფიო დასტურია. მისი თქმით, ეს დოკუმენტი ცალსახად აჩვენებს, რომ ამერიკის სტრატეგიული ინტერესების ფოკუსში ქართველი ხალხი და ქვეყნის დემოკრატიული განვითარებაა და არა „ქართული ოცნების“ ხელისუფლება.

„წარმომადგენელთა პალატის აქტი კიდევ ერთი დადასტურებაა, რომ ამერიკა ქართველი ხალხის, საქართველოს გვერდითაა და მათი მხარდაჭერა გაგრძელდება“, – აღნიშნა შარაშიძემ. მან ხაზი გაუსვა, რომ აშშ-მა წლების განმავლობაში უზარმაზარი ძალისხმევა ჩადო საქართველოში დემოკრატიული ინსტიტუტების მშენებლობაში.

კრიტიკა ხელისუფლების მისამართით

გიორგი შარაშიძემ მწვავედ გააკრიტიკა მმართველი გუნდი. მისი შეფასებით, „ქართული ოცნება“ პასუხისმგებელია აშშ-სთან სტრატეგიული ურთიერთობების გაუარესებაზე. ოპოზიციონერი პოლიტიკოსი აღნიშნავს, რომ პრემიერ-მინისტრ ირაკლი კობახიძის რიტორიკა და სახელმწიფო მდივნის მიმართ გამოთქმული ბრალდებები არ შეესაბამება ქვეყნის ინტერესებს.

3 ფოტო — დააჭირე გასადიდებლად

„სამწუხარო რეალობაა, რომ ნაცვლად ურთიერთობების გადატვირთვისა, ვხედავთ, როგორ პასუხობს ბატონი კობახიძე ამერიკის სახელმწიფო მდივანს და ფაქტობრივად ტყუილში ადანაშაულებს მას. ეს პასუხისმგებლობა, რაც სტრატეგიული პარტნიორობის განულებას გულისხმობს, „ქართულ ოცნებას“ ვერ აცდება“, – განაცხადა შარაშიძემ.

კონგრესმენ ჯო უილსონის პოზიცია

საკანონმდებლო ინიციატივასთან დაკავშირებით, შარაშიძემ ყურადღება გაამახვილა კონგრესმენ ჯო უილსონის გამოსვლაზე, რომელსაც აშშ-ის სახელმწიფო მდივანიც დაეთანხმა. მისი თქმით, ქართული მხარე მსგავს გზავნილებთან მიმართებაში მეტი სიფრთხილით უნდა მოეკიდოს.

შეგახსენებთ, რომ აშშ-ის წარმომადგენელთა პალატამ მიიღო „კავკასიაში ჩინეთის კონტროლის წინააღმდეგ ბრძოლის აქტი“. დოკუმენტი ითხოვს საიდუმლო ანგარიშის მომზადებას საქართველოში რუსულ და ჩინურ სადაზვერვო საქმიანობასთან დაკავშირებით. კონგრესმენმა ჯო უილსონმა კენჭისყრამდე განაცხადა, რომ „ქართული ოცნების“ რეჟიმი ქვეყნის ჩინეთისა და რუსეთისთვის მიყიდვის პროცესშია, რაც ეწინააღმდეგება ქართველი ხალხის ნებას.