ქარელის მუნიციპალიტეტში სასოფლო-სამეურნეო სექტორისთვის მნიშვნელოვანი ინფრასტრუქტურული პროექტი დასრულდა. შპს „საქართველოს მელიორაციამ“ სკრა-ქარელის მაგისტრალურ არხზე სარეაბილიტაციო სამუშაოები დაასრულა, რამაც რეგიონში წყლის მიწოდების სტაბილურობა გაზარდა.

სამუშაოები არხის დაახლოებით 11-კილომეტრიან მონაკვეთს მოიცავდა. სპეციალისტებმა არხი გაწმინდეს დანალექი გრუნტისა და მცენარეული საფარისგან, რის შემდეგაც დაზიანებული ფილები ახალი ბეტონის კონსტრუქციებითა და ბორდიურებით ჩაანაცვლეს. პროცესის ფარგლებში ასევე მოეწყო მონოლითური ბეტონის მონაკვეთები.

3 ფოტო — დააჭირე გასადიდებლად

ინფრასტრუქტურული გაუმჯობესებები შეეხო ძამის დიუკერსაც, სადაც დაზიანებული სეგმენტები აღდგა და მოეწყო ჰიდროტექნიკური ნაგებობები. პროექტის საერთო ღირებულებამ 5.3 მილიონი ლარი შეადგინა.

სამუშაოების შედეგად, არხის ტექნიკური მდგომარეობა საგრძნობლად გაუმჯობესდა, რაც სარწყავი წყლის გამტარუნარიანობის ზრდაში აისახა. ამ დროისთვის, რეგიონში 3240 ჰექტარ სასოფლო-სამეურნეო ფართობზე წყლის მიწოდება უკვე სტაბილურად ხორციელდება.

შპს „საქართველოს მელიორაციის“ გენერალურმა დირექტორმა გიგლა თამაზაშვილმა დასრულებული სამუშაოები ადგილზე დაათვალიერა და არსებულ შედეგებს გაეცნო.