საზოგადოებრივი აქტივისტი ლალი მოროშკინა ირაკლი კობახიძის მონაწილეობით გამართულ ბოლო დებატებს ეპოქალური მნიშვნელობის მოვლენად აფასებს. სოციალურ ქსელში გამოქვეყნებულ ვრცელ პოსტში ის აღნიშნავს, რომ პრემიერის გამოსვლამ საბოლოოდ ახადა ფარდა იმ პროცესებს, რომლებიც, მისი თქმით, საქართველოს საზიანოდ მიმდინარეობდა.

რა ითქვა დებატებისას?

მოროშკინას მტკიცებით, დებატების ფარგლებში დასახელდა ყველა ის მექანიზმი, რომელიც ევროკავშირის კარნახით იყო ამოქმედებული. ავტორი მიიჩნევს, რომ ეს პროცესები ქვეყნისთვის დამღუპველი იყო და მათ მთავრობის მხრიდან შესაბამისი პასუხი გაეცათ.

„მძიმე იყო იმის მოსმენა, თუ როგორ დასაკლავი ცხვარივით, ფეხზე ბაწარგამობმული საქართველო ან დაიჩოქებდა, ან სანქციების ფონზე სულს დალევდა“, — წერს მოროშკინა.

„იატაკქვეშეთი“ და თვითორგანიზაცია

პუბლიცისტი ღიად საუბრობს იმ პერიოდზე, როდესაც ქვეყანაში დაძაბულობის ესკალაციას ელოდნენ. მისი თქმით, არსებობდა მოქალაქეთა ჯგუფები, რომლებიც მზად იყვნენ, რადიკალური ქმედებების შემთხვევაში, ქუჩაში გამოსულიყვნენ და სახელმწიფო დაეცვათ.

„დიახ, ადგილი ჰქონდა თვითორგანიზაციას და ქუჩებში გამოსვლებისთვის მზადებას. ველოდებოდით სიგნალს, რომ დაგვეცვა სამშობლო“, — აცხადებს ლალი მოროშკინა.

მთავრობის როლი

მოროშკინა ხაზს უსვამს ირაკლი კობახიძის პოლიტიკურ პასუხისმგებლობას. მისი თქმით, პრემიერი მუდმივად იძლეოდა იმის გარანტიას, რომ სახელმწიფო ინსტიტუტები, მათ შორის პოლიცია და ჯარი, სიტუაციას სრულად აკონტროლებდნენ.

დასასრულს, ავტორი აღიარებს, რომ თავდაპირველად პრემიერის დებატებში მონაწილეობის წინააღმდეგი იყო, თუმცა ახლა მიიჩნევს, რომ ეს ფორმატი აუცილებელი იყო საზოგადოებისთვის სათქმელის მისაწოდებლად. „დიდი მადლობა პრემიერო!“, — ასე ასრულებს მოროშკინა თავის მიმართვას.