„ერთიანობა - ნაციონალური მოძრაობის“ ერთ-ერთი ლიდერი ლევან ხაბეიშვილი, რომელიც ამჟამად პატიმრობაში იმყოფება, საჯარო წერილს აქვეყნებს. ხაბეიშვილი ხელისუფლების მიერ წარმოებულ საგამოძიებო მოქმედებებს აკრიტიკებს და მათ „გამოძიებობანას თამაშს“ უწოდებს.

ორი წელი და „სიზმრები“

პოლიტიკოსი აღნიშნავს, რომ მომხდარი ფაქტებიდან ორი წელი გავიდა, თუმცა ხელისუფლების წარმომადგენლებმა გამოძიების დაწყება მხოლოდ ახლა გადაწყვიტეს. მისი თქმით, წამებისა და გატაცების საქმეებზე რეაგირება დაგვიანებულია.

ხაბეიშვილი მიიჩნევს, რომ სამართალდამცავები მხოლოდ ე.წ. „ლიფსიტებს“ იჭერენ და რეალურ დამნაშავეებს ხელს აფარებენ. მისი განცხადებით, პასუხისმგებლობა პირველ რიგში კონკრეტულ პირებს უნდა დაეკისროთ.

ვინ არის პასუხისმგებელი?

წერილში დასახელებულია რამდენიმე მაღალჩინოსანი, რომელთა პასუხისმგებლობის საკითხსაც ხაბეიშვილი აყენებს:

  • ხარება და გოგა მემანიშვილი;
  • ბიძინა ივანიშვილი;
  • ირაკლი კობახიძე;
  • მამუკა მდინარაძე;
  • გრიგოლ ლილუაშვილი;
  • ვახტანგ გომელაური.

ხაბეიშვილის მტკიცებით, სწორედ ამ პირებმა მისცეს „მწვანე შუქი“ სისტემას, რომელიც ადამიანების წამებას ახორციელებდა.

„თუ ამათი პასუხისმგებლობა არ დგება, აბა ვის აინტერესებს უსახელო და უგვარო ვიღაც ბაღლინჯოები?! ამ წამებას ჰყავდა ერთი მთავარი ორგანიზატორი და ეს არის ივანიშვილის მწამებელი სისტემა“, - წერს პოლიტიკოსი.

მოწოდება აქტიურობისკენ

ლევან ხაბეიშვილი ოპოზიციურ სპექტრს, მედიასა და საზოგადოებას აქტიურობისკენ მოუწოდებს. მისი თქმით, „დაველოდოთ“ სტრატეგია შედეგს არ მოიტანს და რეჟიმის დამარცხება მხოლოდ მუდმივი პრესინგითა და ბრძოლით არის შესაძლებელი.

„გთხოვთ გაიხადეთ სმოკინგები, დაწვით ეგ „კოსტუმები!“ დაიჭირეთ ხელში რუპორი და არ დანებდეთ ივანიშვილის რეჟიმს“, - ნათქვამია განცხადებაში. ხაბეიშვილი მიიჩნევს, რომ ქვეყანაში მიმდინარე პროცესების შეცვლა მოქალაქეების აქტიურ ჩართულობაზეა დამოკიდებული.