საპარლამენტო უმრავლესობის წევრი და ევროპასთან ინტეგრაციის კომიტეტის თავმჯდომარე ლევან მახაშვილი ოპოზიციას ვიზალიბერალიზაციის თემის პოლიტიზებაში ადანაშაულებს. მახაშვილის თქმით, ოპოზიციურმა ძალებმა ამ საკითხზე ფსონის დადება გადაწყვიტეს, რადგან სხვა პოლიტიკური საყრდენი მათ აღარ გააჩნიათ.

„ჩვენ ვხედავთ, რომ გრძელდება პოლიტიკური ჟონგლიორობა ვიზალიბერალიზაციის საკითხით. ჩვენმა ძვირფასმა ოპოზიციამ რატომღაც ჩათვალა, რომ ამ თემაზე დადოს ფსონი თავიანთ უცხოურ მფარველებთან ერთად, ვინაიდან, როგორც ჩანს, სხვა ხავსი, რასაც შეიძლება მოეკიდონ, აღარ არის“, — განაცხადა მახაშვილმა პლენარულ სხდომაზე.

დეპუტატმა ხაზი გაუსვა, რომ საქართველო ნაკისრ ვალდებულებებს კეთილსინდისიერად ასრულებს. მისი მტკიცებით, ევროკავშირის წევრი ქვეყნები საქართველოს მხრიდან საფრთხეს — მათ შორის უკანონო მიგრაციას ან დანაშაულებრივ ქმედებებს — არ უნდა ელოდნენ. მახაშვილის თქმით, ქვეყანამ ბოლო პერიოდში მიგრაციული სისტემის გამართულად ფუნქციონირებისთვის საჭირო მნიშვნელოვანი საკანონმდებლო ცვლილებები განახორციელა.

ტექნიკური დიალოგი ბრიუსელში

11 ივნისს ბრიუსელში დაგეგმილ შეხვედრაზე ქართული მხარე შესაბამის უწყებებს კონკრეტული მტკიცებულებების წარდგენის შესაძლებლობას მისცემს. მახაშვილის განცხადებით, ეს შეხვედრა იქნება ტესტი იმისა, თუ რამდენად არის ბრიუსელი დაინტერესებული საკითხის არსში ჩაღრმავებით.

„გამოჩნდება, ბრიუსელი გულწრფელად არის დაინტერესებული, რომ ამ საკითხების სიღრმეებში ჩავიდეს, თუ უნდა, რომ რაღაც პოლიტიკურ გადაწყვეტილებამდე კიდევ რამდენიმე ტექნიკური სპექტაკლი მოაწყოს“, — აღნიშნა დეპუტატმა.

კრიტიკა დიპლომატების მიმართ

ლევან მახაშვილმა უკმაყოფილება გამოთქვა ზოგიერთი დიპლომატის ქმედებებთან დაკავშირებით. მიუხედავად იმისა, რომ მადლობა გადაუხადა კეთილსინდისიერ პარტნიორებს, მან გააკრიტიკა ის პირები, რომლებიც მისი თქმით, „დიპლომატის საფარქვეშ ვიწრო დღის წესრიგს ატარებენ“.

„მეგობრებო, თქვენი არც შესაჭრელი, შესაკერი და გადასარჩენი საქართველოს არაფერი არ სჭირს. ერთადერთი, რითაც თქვენ შეგიძლიათ საუკეთესო სამსახური გაუწიოთ საქართველოს, არის ის, რომ აცადოთ ამ ქვეყანას მშვიდობიანი, ნორმალური, სტაბილური განვითარება“, — მიმართა მან უცხოელ წარმომადგენლებს.