საქართველოს შინაგან საქმეთა სამინისტრომ მესტიის მუნიციპალიტეტში კრიპტოვალუტის უკანონო მოპოვების წინააღმდეგ პირველი ოპერატიული ღონისძიება გაატარა. სამართალდამცველებმა ექვს სხვადასხვა ლოკაციაზე ჩატარებული რეიდის შედეგად 148 სპეციალური დანადგარი ამოიღეს.

გამოძიების ინფორმაციით, ადგილობრივი მცხოვრებლები წლების განმავლობაში იყენებდნენ მაღალი სიმძლავრის მოწყობილობებს, რათა ციფრული აქტივები გამოემუშავებინათ. ეს პროცესი ხორციელდებოდა ენერგორესურსების მოხმარების წესების უხეში დარღვევით.

საგამოძიებო უწყების განცხადებით, უკანონო მაინინგი პირდაპირ კავშირშია რეგიონში ელექტროენერგიის გადაჭარბებულ მოხმარებასთან. მრავალრიცხოვანმა დანადგარმა ენერგოსისტემაზე დამატებითი დატვირთვა შექმნა, რამაც სვანეთში ელექტროენერგიის სისტემატური წყვეტები გამოიწვია.

საქმესთან დაკავშირებით გამოძიება გრძელდება. სამართალდამცველები სხვა შესაძლო დამრღვევთა იდენტიფიცირებას ცდილობენ.

საქმეზე გამოძიება საქართველოს სისხლის სამართლის კოდექსის 229-ე მუხლის მე-2 ნაწილის „ბ“ ქვეპუნქტით მიმდინარეობს, რაც ენერგორესურსებით სარგებლობის წესების დარღვევას გულისხმობს. დანაშაული სამ წლამდე თავისუფლების აღკვეთას ითვალისწინებს.

მესტიაში არსებული შეღავათიანი ტარიფი, რომელიც მაღალმთიანი რეგიონის მხარდაჭერას ისახავს მიზნად, წლების განმავლობაში უკანონო ბიზნესის საფუძველი გახდა. მხოლოდ 2025 წელს მესტიაში მოხმარებულმა ელექტროენერგიამ 133 მილიონი კილოვატ-საათი შეადგინა, რაც ქვეყნის სხვა მუნიციპალიტეტების მაჩვენებელს მნიშვნელოვნად აღემატება.

3 ფოტო — დააჭირე გასადიდებლად

სახელმწიფო მინისტრი მამუკა მინდარაძე აცხადებს, რომ მსგავსი ქმედებებით მიყენებული ზარალი წლიურად 20-25 მილიონ ლარს აღწევს, რაც საბოლოო ჯამში საქართველოს ყველა მომხმარებლისთვის ტვირთად იქცევა. მთავრობა უკვე იწყებს სისტემურ ცვლილებებს, მათ შორის მრიცხველების დამონტაჟებას და უფასო მოხმარების ზედა ზღვარის დაწესებას.