თბილისში ნარკოტიკული საშუალებების ზედოზირების შედეგად გარდაცვალების შემთხვევები კვლავ საგანგაშო ნიშნულზეა. ბოლო ფატალური შემთხვევა ჩიქოვანის ქუჩაზე დაფიქსირდა, სადაც ერთ-ერთ საცხოვრებელ ბინაში ქალისა და მამაკაცის ცხედრები იპოვეს. მეზობლები და გარდაცვლილთა ახლობლები მომხდარს ნარკოტიკული ნივთიერებების ჭარბ მოხმარებას უკავშირებენ.

გამოძიება და ოჯახების ტრაგედია

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. თუმცა, ეს ტრაგიკული შემთხვევა ერთადერთი არ არის. 12 მაისს მსგავსი გარემოებებით 22 წლის დავით ბლიაძე გარდაიცვალა. ახალგაზრდა საკუთარ ბინაში უგონო მდგომარეობაში იპოვეს, თუმცა სასწრაფო დახმარების ბრიგადას მისი გადარჩენა ვეღარ შეძლო.

გარდაცვლილის ოჯახის წევრები, კონკრეტულად კი ბაბუა, გია ყრუაშვილი, აცხადებენ, რომ მათმა შვილიშვილმა ნივთიერება Telegram-არხის საშუალებით შეიძინა. ოჯახის ინფორმაციით, გამოძიებას უკვე აქვს ვიდეოკამერების ჩანაწერები, სადაც ნათლად ჩანს, როგორ იღებს ახალგაზრდა ნივთიერებას ვარკეთილის მეტროს მიმდებარედ, ე.წ. „დადების“ მეთოდით.

„ადგილზე მოსული პოლიციის განმარტებით, იმავე ღამეს თბილისში გარდაიცვალა ხუთი ახალგაზრდა. ვიდექით 5 გაუბედურებული მშობელი, რომლებმაც შავი ცელოფნებით წამოვასვენეთ ბავშვები სამხარაულის ექსპერტიზის ბიუროდან“, — იხსენებს გია ყრუაშვილი.

სპეციალისტების გაფრთხილება

ექიმი-ნარკოლოგი და პარტია „ფედერალისტების“ წევრი ზურაბ სიხარულიძე არსებულ ვითარებას კატასტროფულს უწოდებს. მისი თქმით, ონლაინ-პლატფორმების საშუალებით სინთეტიკური ნარკოტიკების გავრცელება უკონტროლოა და ნებისმიერ მსურველს შეუძლია, წუთებში შეიძინოს სასიკვდილო ნივთიერება.

„ჩვენ მივიღებთ კატასტროფას – სიკვდილს, სიკვდილს, სიკვდილს! ხულოს ყველაზე მაღალ სოფელშიც კი იყიდი წამალს. გაივსო ქვეყანა ბიტკოინის აპარატებით, სადაც შეგიძლია პირდაპირ იყიდო ნარკოტიკები“, — განაცხადა სიხარულიძემ.

სპეციალისტები ხაზს უსვამენ, რომ არსებული ნარკოპოლიტიკა ვერ პასუხობს თანამედროვე გამოწვევებს, მაშინ როდესაც ციფრული ტექნოლოგიების გამოყენებით ნარკოვაჭრობა მასშტაბურ ხასიათს იღებს და სულ უფრო მეტ ახალგაზრდას იწირავს.