რუსთავში, N31 საბავშვო ბაღის ტერიტორია გამწვანდა. რეკრეაციული სივრცეების მოწყობის პროგრამის ფარგლებში, დაწესებულების ეზოში 500-მდე ფოთლოვანი და წიწვოვანი სახეობის ხე-მცენარე დაირგო.

სამუშაოებს ინფრასტრუქტურის სამინისტროს მუნიციპალური განვითარების ფონდი ახორციელებს. როგორც უწყებაში განმარტავენ, პროცესი აგროტექნიკური სტანდარტების სრული დაცვით მიმდინარეობს, რაც ნარგავების გახარებასა და მათ შემდგომ განვითარებას უზრუნველყოფს.

ჯანსაღი გარემო აღსაზრდელებისთვის

გამწვანების პროექტის მიზანი ბავშვებისთვის მაქსიმალურად კომფორტული და ეკოლოგიურად სუფთა გარემოს შექმნაა. 450 აღსაზრდელზე გათვლილი ბაღი, რომელიც მანამდე თანამედროვე სტანდარტების შესაბამისად რეაბილიტირდა, ახლა უკვე კეთილმოწყობილი ეზოთიც გამოირჩევა.

რეაბილიტაციის ფარგლებში შენობა სრულად განახლდა. ინფრასტრუქტურა სრულად მორგებულია ბავშვთა უსაფრთხოებასა და მათ განვითარებაზე ორიენტირებულ საჭიროებებს.

სამუშაოების მონიტორინგი

გამწვანების პროცესს პირადად გაეცნენ მუნიციპალური განვითარების ფონდის აღმასრულებელი დირექტორი გიორგი შონია და რუსთავის მერი ნინო ლაცაბიძე. მათთან ერთად ადგილზე იმყოფებოდნენ ადგილობრივი ხელისუფლების სხვა წარმომადგენლებიც.

შეგახსენებთ, რომ რეკრეაციული სივრცეების განვითარება რუსთავის მასშტაბით ინფრასტრუქტურული პროექტების ერთ-ერთი პრიორიტეტული მიმართულებაა, რაც ქალაქში ეკოლოგიური მდგომარეობის გაუმჯობესებას ისახავს მიზნად.