საქართველოს პარლამენტმა განათლების სისტემაში მნიშვნელოვანი ცვლილებები დაამტკიცა. „ზოგადი განათლების შესახებ“ კანონში შესული შესწორებებით, სასკოლო სახელმძღვანელოების მომზადებისა და დანერგვის პროცესი სრულად იცვლება.

საკანონმდებლო ორგანომ დოკუმენტს 77 ხმით დაუჭირა მხარი. ინიციატივა პლენარულ სხდომაზე დაჩქარებული წესით, განათლების, მეცნიერებისა და ახალგაზრდობის მინისტრის მოადგილემ, თამარ მახარაშვილმა წარადგინა.

რა იცვლება სასწავლო პროცესში?

ცვლილებების თანახმად, განათლების სამინისტროს მიერ შექმნილი სახელმძღვანელოების დანერგვა ეტაპობრივად მოხდება. პროცესი ორ ძირითად სასწავლო წელს მოიცავს:

  • 2026-2027 სასწავლო წელი;
  • 2027-2028 სასწავლო წელი.

განახლება განხორციელდება ცალკეული კლასებისა და საგნების მიხედვით. ეს ნიშნავს, რომ მოსწავლეები და პედაგოგები ახალ სასწავლო რესურსებზე თანდათანობით გადავლენ.

სავალდებულო სტანდარტი 2028 წლიდან

კანონპროექტი ადგენს მკაფიო ზღვარს. 2028 წლის 1 სექტემბრიდან ყველა ზოგადსაგანმანათლებლო დაწესებულება ვალდებული იქნება, სასწავლო პროცესი მხოლოდ სამინისტროს მიერ შექმნილი ან მათთან შეთანხმებული სახელმძღვანელოებით წარმართოს.

ამ ვადისთვის სახელმძღვანელოების შექმნისა და დანერგვის მთლიანი ციკლი დასრულებული იქნება. სრული პროცესი საბოლოო სახეს 2028-2029 სასწავლო წლის დაწყებამდე მიიღებს.

აღნიშნული ცვლილება სახელმწიფოს მხრიდან სასწავლო რესურსების კონტროლისა და სტანდარტიზაციის ახალი ეტაპია. სამინისტრო უშუალოდ ჩაერთვება იმ წიგნების შინაარსის ფორმირებაში, რომლითაც ქართველი მოსწავლეები განათლებას მიიღებენ.