ლონდონის ცენტრში, მარშამის ქუჩაზე მდებარე სამთავრობო კომპლექსში, რომელიც შინაგან საქმეთა სამინისტროსა და საცხოვრებლის, თემთა და ადგილობრივი თვითმმართველობის სამინისტროს (MHCLG) აერთიანებს, ფარული კამერა აღმოაჩინეს. მოწყობილობა შენობის საერთო სარგებლობის ზონაში, ჭერის პანელის უკან იყო დამონტაჟებული.

ინფორმაციას პირველად გამოცემა „i“ ავრცელებს. წყაროების ცნობით, მოწყობილობა ბოლო ორი თვის განმავლობაში აღმოაჩინეს. მომხდარის შესახებ უკვე ინფორმირებულნი არიან უსაფრთხოების შესაბამისი სამსახურები. შინაგან საქმეთა სამინისტროს ინფორმაციით, კამერა განთავსებული იყო MHCLG-ის სექტორში, რაც მინისტრების კაბინეტებისგან მოშორებით მდებარეობს.

შენობა სტრატეგიული მნიშვნელობისაა, რადგან სწორედ აქ წყდება ინგლისისა და უელსის პოლიციური საქმიანობის, ეროვნული უსაფრთხოებისა და საცხოვრებელი პოლიტიკის საკითხები. ოფიციალური უწყებები ინციდენტზე კომენტარის გაკეთებას თავს არიდებენ. MHCLG-ის პრესსპიკერმა განაცხადა, რომ უსაფრთხოების საკითხებზე კომენტარს არ აკეთებენ, ხოლო შინაგან საქმეთა სამინისტროსა და პრემიერ-მინისტრის ოფისმა კომენტარისგან თავი შეიკავეს.

პოლიტიკური გამოხმაურება

ოპოზიციური პარტიის წარმომადგენელმა, ალექს ბურგჰარტმა, მომხდარს „სერიოზული ინციდენტი“ უწოდა და დაუყოვნებლივ გამოძიების დაწყება მოითხოვა. მისი თქმით, ეს ფაქტი კითხვის ნიშნის ქვეშ აყენებს მთავრობის უსაფრთხოების სტანდარტებს.

„საზოგადოება იმსახურებს პასუხებს. ჩვენ სასწრაფოდ უნდა ვიცოდეთ, ვინ არის პასუხისმგებელი, რამდენი ხანი იყო ეს მოწყობილობა დამონტაჟებული და მოხდა თუ არა რაიმე სახის მგრძნობიარე ან კლასიფიცირებული ინფორმაციის კომპრომეტირება“, - განაცხადა ბურგჰარტმა.

ამ დროისთვის უცნობია, ვინ დაამონტაჟა კამერა და რა მიზანს ემსახურებოდა ის. გამოძიება გრძელდება, თუმცა ხელისუფლების მხრიდან დუმილის შენარჩუნება საზოგადოებაში კითხვებს აძლიერებს.