ქართული ფეხბურთის ლეგენდამ, ვლადიმერ გუცაევმა, UG Art-ის პოდკასტში სტუმრობისას ეროვნული ნაკრების გარშემო არსებულ ვითარებაზე კრიტიკული შეფასება გააკეთა. ვეტერანი ფეხბურთელის აზრით, საქართველოს ნაკრები იმ დონეზე დაბრუნდა, სადაც 3-4 წლის წინ იმყოფებოდა.

გუცაევი მიიჩნევს, რომ ევრო 2024-მა საქართველო საფეხბურთო რუკაზე გამოაჩინა, თუმცა მას შემდეგ გუნდის შედეგები არასახარბიელოა. „ვერ ვიტყვი, რომ დღეს საქართველო საფეხბურთო ქვეყანაა. ევროპის ჩემპიონატის შემდეგ ჩვენი თამაში წარუმატებელია“, - აცხადებს გუცაევი.

სპეციალისტი განსაკუთრებულ ყურადღებას გუნდის დაკომპლექტებასა და მუდმივობაზე ამახვილებს. მისი თქმით, გუნდი მაშინ ითვლება ჩამოყალიბებულად, როდესაც ნებისმიერ დროს შესაძლებელია სასტარტო შემადგენლობის ძირითადი ბირთვის დასახელება. გუცაევის აზრით, ამჟამად ნაკრებში ეს სტაბილურობა არ იგრძნობა.

„ერთადერთი მაგარი ფეხბურთელი, ვისაც დღეს ვხედავთ, ხვიჩა კვარაცხელიაა. თუმცა, ერთი ფეხბურთელით ვერაფერს იზამ. გუნდს მინიმუმ 8 ძლიერი მოთამაშე სჭირდება, რომ დანარჩენმა პოზიციებმა საშუალო დონეზე მაინც იმოქმედოს. 3-4 კარგი მოთამაშე გუნდს ვერ შველის“, - აღნიშნავს ვეტერანი.

გუცაევმა მაგალითად „დინამო თბილისის“ ოქროს ხანა მოიყვანა, სადაც 9 მაღალი კლასის ფეხბურთელი ქმნიდა სერიოზულ ძალას. მისი თქმით, თუ გუნდში მსგავსი ბალანსი არ არის, მას ვერ ჩავთვლით ძლიერ საფეხბურთო ერთეულად.

შეგახსენებთ, რომ 2024 წლის ისტორიული წარმატების შემდეგ, ვილი სანიოლის გუნდს რთული პერიოდი დაუდგა. ერთა ლიგის B დივიზიონში ნაკრებმა მხოლოდ 7 ქულა დააგროვა და ჩეხეთსა და უკრაინას ჩამორჩა. არანაკლებ რთული აღმოჩნდა 2025 წელიც, სადაც მსოფლიო ჩემპიონატის შესარჩევ ციკლში საქართველომ ესპანეთთან და თურქეთთან წააგო და ჯგუფში მხოლოდ 3 ქულა მოიპოვა.