iOS 27-ის ფარული სიახლეები: რა დარჩა Apple-ის პრეზენტაციას მიღმა

Apple-ის წლევანდელ Worldwide Developer Conference-ზე (WWDC) ყურადღების ცენტრში ხელოვნურ ინტელექტზე დაფუძნებული Siri მოექცა. მიუხედავად იმისა, რომ iOS 27-ში რევოლუციური ცვლილებები არ შეინიშნება, Apple-მა დაამატა დეტალები, რომლებიც iPhone-ის მომხმარებლების ყოველდღიურ გამოცდილებას აუმჯობესებს.

განახლებების ნაწილი პრეზენტაციის მიღმა დარჩა, თუმცა ისინი მნიშვნელოვან კომფორტს ქმნის. ერთ-ერთი ასეთი სიახლეა სახლის ეკრანზე სრულეკრანიანი ვიჯეტების დამატების შესაძლებლობა, რაც ახალი ამბების ან კალენდრის თვალყურის დევნებას აადვილებს.

მომხმარებლებისთვის ერთ-ერთი ყველაზე მოთხოვნადი ფუნქცია დაემატა ხმის მართვის სისტემაში. ახლა უკვე შესაძლებელია მაღვიძარას, ტაიმერისა და სისტემური შეტყობინებების ხმის დონის ინდივიდუალურად დარეგულირება. ამისთვის საჭიროა Settings-ში შესვლა და Match Ringtone Volume-ის გამორთვა.

ტექსტისა და გამოსახულებების კოპირება უფრო მარტივი გახდა. კლავიატურაზე გამოჩნდება სპეციალური ღილაკი, რომელიც ბუფერში არსებული ინფორმაციის ჩასმას ერთი შეხებით გაძლევთ საშუალებას. ეს მიდგომა მსგავსია იმისა, თუ როგორ მუშაობს ერთჯერადი კოდების ავტომატური შევსება.

დიზაინერული ცვლილებები შეეხო ამინდის აპლიკაციასაც. მას დაემატა Highlights სექცია, რომელიც მომავალი დღეების მნიშვნელოვან მოვლენებს გამოყოფს. ასევე, გამარტივდა ნავიგაცია ამინდის პირობებს, ნალექსა და ქარის სიჩქარეს შორის.

შეტყობინებების აპლიკაცია (Messages) ახლა მომხმარებელს აძლევს არჩევანს, გამოაჩინოს თუ არა ხმოვანი შეტყობინების ან კარნახის ღილაკები. გარდა ამისა, დაემატა Drawing ფუნქცია, რომელიც ხელნაწერი შენიშვნების ან ესკიზების გაგზავნის საშუალებას იძლევა.

კამერის მართვის პანელი სრულად გადამუშავდა. მომხმარებლებს გაუმარტივდათ წვდომა ისეთ პარამეტრებზე, როგორიცაა სიღრმის ეფექტი, ბადე და დონის მაჩვენებელი.

სხვა მცირე, თუმცა სასარგებლო ცვლილებებს შორის არის: ემოჯების კლავიატურაზე დამატებული გადახვევის ზოლი, ტაიმერის ახალი დიზაინი საკონტროლო ცენტრში და Find My-ში კონკრეტული ადამიანისთვის მდებარეობის დროებით დამალვის ფუნქცია.

Wallet-ის აპლიკაცია ახლა პერსონალიზებული საშვების შექმნის საშუალებას იძლევა, ხოლო CarPlay-ში დაემატა აუდიო გადახვევის (scrubbing) ფუნქცია. გარდა ამისა, შესაძლებელი გახდა ფაილების, ფოტოებისა და ჯანმრთელობის მონაცემების ხელით სინქრონიზაცია iCloud-თან.