უკრაინის მიერ რუსეთის მიერ ოკუპირებულ ტერიტორიებზე დრონების გამოყენებით წარმოებული ინტენსიური კამპანია მოსკოვის მომარაგების ხაზებს სერიოზულად აფერხებს. ეს პროცესი კიდევ უფრო ამწვავებს საწვავის კრიზისს, რომელიც რუსეთის ნავთობგადამამუშავებელ ქარხნებზე განხორციელებული შორ მანძილზე დარტყმების შედეგად დაიწყო.

ყირიმი, რომელიც რუსეთმა 2014 წელს უკანონოდ მიიტაცა, განსაკუთრებით რთულ ვითარებაშია. ნახევარკუნძულზე ლოგისტიკური შეფერხებები და საწვავის დეფიციტი უკვე ყოველდღიურობად იქცა. პრობლემების დიდი ნაწილი უკავშირდება უკრაინული ძალების მიერ როსტოვისა და ოკუპირებული მარიუპოლის დამაკავშირებელ მთავარ საავტომობილო გზებსა და ხიდებზე მიტანილ დარტყმებს.

საფრანგეთში დაფუძნებული ანალიტიკური ცენტრის, Atum Mundi-ს ექსპერტის, კლემენტ მოლინის შეფასებით, ეს გზა ოკუპაციის „ხერხემალია“ სამხრეთში. მაისის დასაწყისიდან უკრაინამ 300-მდე დრონით შეტევა განახორციელა სატვირთო ავტომობილებზე, მათ შორის 30 ბენზინმზიდზე. უკრაინის დრონების ძალების მეთაურის, რობერტ ბროვდის განცხადებით, მაისის ბოლოდან ივნისის დასაწყისამდე ამ გზაზე სამხედრო ტვირთების გადაზიდვა 71%-ით შემცირდა.

საწვავის დეფიციტი იმდენად მწვავეა, რომ ყირიმის ავტოგასამართ სადგურებზე მომხმარებლებს საწვავის შეძენა შეზღუდული რაოდენობით, ვაუჩერებით უწევთ. ადგილობრივი მოსახლეობა და ტურისტები სოციალურ ქსელებში უკმაყოფილებას გამოხატავენ და საწვავის ჩასასხმელად 10-საათიან რიგებზე საუბრობენ. მოსკოვის მიერ დანიშნულმა ხელმძღვანელმა სერგეი აქსიონოვმა აღიარა, რომ ამ ეტაპზე მოთხოვნის სრულად დაკმაყოფილება შეუძლებელია და საწვავის სიმცირის გამო ასობით ავტობუსი რეისებზე ვერ გადის.

რუსეთის ენერგეტიკის სამინისტრომ პირველად ოფიციალურად აღიარა პრობლემები „სამხრეთ რეგიონებში“, რაც ოკუპირებულ ტერიტორიებს გულისხმობს. უწყებამ განაცხადა, რომ ენერგეტიკული საწარმოები მუდმივი საჰაერო თავდასხმების სამიზნეა, რის გამოც შეიქმნა სპეციალური შტაბი ვითარების დასარეგულირებლად.

სიტუაციას ართულებს ის ფაქტიც, რომ ზღვის გზა სახიფათოა, ხოლო ქერჩის ხიდი, რომელიც ყირიმს რუსეთთან აკავშირებს, მუდმივი სამხედრო საფრთხის ქვეშაა. ექსპერტების აზრით, საწვავის ტრანსპორტირება სახმელეთო გზით, მარიუპოლის გავლით, მუდმივ რისკს შეიცავს, რაც რუსულ ლოგისტიკას პარალიზების პირას აყენებს.