2006 წლის ე.წ. ნავთლუღის სპეცოპერაციის დროს დაღუპულის მამამ, მიხეილ ართმელაძემ, პარლამენტის დროებით საგამოძიებო კომისიის სხდომაზე „ნაციონალური მოძრაობის“ მმართველობის პერიოდი გაიხსენა. მისი თქმით, მაშინდელი ხელისუფლების წარმომადგენლები მოქალაქეების მიმართ პირდაპირ ძალადობას ახორციელებდნენ.
ართმელაძემ განაცხადა, რომ მისი შვილი, რომელიც სამედიცინო ფაკულტეტის სტუდენტი იყო, ხელისუფლების წარმომადგენლებმა მოკლეს. მისივე თქმით, ოჯახმა ამ ტრაგედიის შედეგად ორმაგი დარტყმა მიიღო, რამაც დედის გარდაცვალებაც გამოიწვია.
„მთელი ხელისუფლება ავტომატით ხელში“
„მეუბნებიან, ნუთუ დღეს მკვლელობები არ ხდებაო. ამაზე ვპასუხობ: დამიმტკიცეთ, რომ დღეს ხელისუფლების წარმომადგენელი ავტომატს აიღებს და საკუთარ მოქალაქეებზე ინადირებს“, - აღნიშნა ართმელაძემ. მან ხაზი გაუსვა, რომ იმ პერიოდში სახელმწიფო აპარატი პირდაპირ მონაწილეობდა მოქალაქეების ლიკვიდაციაში.
მისი თქმით, მაშინდელი თანამდებობის პირები, რომლებსაც მან „ჯალათები“ და „დედიკოს ბიჭები“ უწოდა, პასუხისმგებლობას არ გრძნობენ. ართმელაძემ გაიხსენა შვილის ცხედრის მდგომარეობა, რომელიც, მისი თქმით, გაკვეთილი და თეთრი ძაფით შეკერილი იყო, რაც ოჯახისთვის დამატებითი ტკივილის წყარო გახდა.
„სისხლიან რეჟიმს გვერდით უდგანან“
მიხეილ ართმელაძემ მკაცრად გააკრიტიკა ის პოლიტიკური ძალები, რომლებიც „ნაციონალურ მოძრაობასთან“ აგრძელებენ თანამშრომლობას. მან აღნიშნა, რომ ასეთ ადამიანებს არ გააჩნიათ მორალი და ღირსება.
„ჯალათებო, თქვენ შვილებს ლოყებზე კოცნით, ჩვენ - საფლავებზე. რამდენი უდანაშაულო დედა შავებით შემოსეთ, რამდენი ოჯახი გააპარტახეთ. მორალ-ღირსება დაკარგულებო, პოლიტიკაში როგორ შემოდიხართ?“ - განაცხადა მან კომისიის სხდომაზე.
ართმელაძის თქმით, ნებისმიერი საღად მოაზროვნე ადამიანი უნდა გრძნობდეს იმ ტკივილს, რაც ამ ოჯახებმა გადაიტანეს. მან დასძინა, რომ მისთვის მიუღებელია იმ ადამიანების პოლიტიკაში ყოფნა, ვინც წარსულში მსგავს დანაშაულებრივ ქმედებებში მონაწილეობდა.
დისკუსია
0 კომენტარი
ჯერ კომენტარი არ არის — იყავი პირველი.