გერმანიის ელჩი საქართველოში, პეტერ ფიშერი, ოთხწლიან დიპლომატიურ მისიას ასრულებს. 40-წლიანი კარიერის მქონე დიპლომატი აღნიშნავს, რომ საქართველო ერთადერთი ქვეყანაა, სადაც მან „უკუსვლა“ იხილა. ფიშერის თქმით, მისი საქართველოში ყოფნის პირველი ნახევარი მჭიდრო პარტნიორობითა და პოზიტიური დღის წესრიგით გამოირჩეოდა, თუმცა 2024 წლიდან ვითარება შეიცვალა.

„ქართული ოცნების“ რიტორიკის ცვლილება

ელჩი იხსენებს, რომ 2023 წლის დეკემბერში, როცა საქართველომ კანდიდატის სტატუსი მიიღო, მმართველი გუნდის წარმომადგენლები მასთან ერთად ზეიმობდნენ. თუმცა, 2024 წლის დასაწყისიდან ვითარება რადიკალურად შეიცვალა. ფიშერი აცხადებს, რომ დასავლეთის, ევროკავშირისა და პირადად მისი მისამართით გაჩნდა მტრული რიტორიკა.

„დავიწყეთ ისეთი კანონების ხილვა, რომლებიც ევროკავშირის კანონმდებლობას ეწინააღმდეგება. ეს არ არის თავსებადი ევროკავშირში გაწევრიანების მიზანთან. ჩვენ ვხედავთ ადამიანის უფლებების დარღვევას და დაშინების ატმოსფეროს“, — აცხადებს ფიშერი „ბათუმელებთან“ ინტერვიუში.

„გლობალური ომის პარტიის“ ნარატივი

გერმანიის ელჩი უარყოფს მმართველი პარტიის მიერ გავრცელებულ კონსპირაციულ თეორიებს, მათ შორის „გლობალური ომის პარტიისა“ და „ღრმა სახელმწიფოს“ შესახებ. ფიშერის შეფასებით, ეს ნარატივი ხელოვნურია და მიზნად ისახავს საზოგადოების დაშინებას.

„მე 40 წელია გერმანიის მთავრობისთვის ვმუშაობ და არასდროს მინახავს არანაირი „ღრმა სახელმწიფო“. ეს არის გამოგონილი ნარატივი, რომელიც მხოლოდ იმისთვის სჭირდებათ, რომ დიპლომატები მსხვერპლად აქციონ და საკუთარი პოლიტიკური მიზნებისთვის გამოიყენონ“, — ამბობს დიპლომატი.

სავიზო რეჟიმი და სანქციების პერსპექტივა

კითხვაზე, შესაძლებელია თუ არა სავიზო რეჟიმის შეჩერება, პეტერ ფიშერი განმარტავს, რომ არსებობს კონკრეტული პირობები, რომელთა დარღვევის შემთხვევაშიც ევროკავშირი ვალდებულია, შეისწავლოს საკითხი. ის ხაზს უსვამს, რომ სავიზო რეჟიმი დაფუძნებულია შეთანხმებაზე და თუ საქართველო პირობებს დაარღვევს, ევროკავშირს შესაბამისი პროცედურების დაწყება მოუწევს.

რაც შეეხება სანქციებს, ელჩი განმარტავს, რომ ევროკავშირს აქვს სამი სამართლებრივი ბაზა სანქციებისთვის: ადამიანის უფლებების დარღვევა, რუსეთის აგრესიული ომის მხარდაჭერა და დეზინფორმაცია. ფიშერის თქმით, უნგრეთის პოზიციის ცვლილებამ შესაძლოა ევროკავშირის შიგნით ამ მექანიზმების გამოყენების ალბათობა გაზარდოს.

ინტერვიუს ბოლოს პეტერ ფიშერმა დაადასტურა, რომ გერმანიის შემდეგი ელჩი საქართველოში ქალი იქნება, რომელიც, მისი თქმით, პროფესიონალი დიპლომატია.