გერმანიის დედაქალაქ ბერლინში სერიოზული სატრანსპორტო შემთხვევა მოხდა. ლიხტენბერგის რაიონში ტრამვაი ლიანდაგიდან გადავიდა, რასაც მგზავრების დაშავება მოჰყვა.

3 ფოტო — დააჭირე გასადიდებლად

სახანძრო-სამაშველო სამსახურის ოფიციალური ინფორმაციით, ინციდენტის შედეგად ჯამში 20 ადამიანი დაშავდა. სამი მათგანის მდგომარეობა მძიმეა, რის გამოც ისინი სასწრაფო წესით საავადმყოფოებში გადაიყვანეს. დანარჩენ 17 მგზავრს მსუბუქი დაზიანებები აღენიშნება, თუმცა ნაწილი მათგანი კლინიკებში შემდგომი დაკვირვებისა და მკურნალობისთვის დარჩა.

წინასწარი მონაცემებით, ტრამვაიმ მოხვევისას კონტროლი დაკარგა და საკონტაქტო ქსელის ბოძს შეეჯახა. სწორედ ამ დარტყმამ გამოიწვია შემადგენლობის ლიანდაგიდან გადასვლა. შემთხვევის ადგილზე მობილიზებული იყო დაახლოებით 60 მაშველი, რომლებიც დაშავებულებს პირველად დახმარებას უწევდნენ.

ამ დროისთვის სამართალდამცავები ავარიის ზუსტი მიზეზების დასადგენად გამოძიებას აწარმოებენ. უცნობია, რა გახდა ლიანდაგიდან გადასვლის კონკრეტული მიზეზი – ტექნიკური გაუმართაობა თუ სხვა ფაქტორები.