აშშ-ის პრეზიდენტმა დონალდ ტრამპმა განაცხადა, რომ ირანთან მიმდინარე მოლაპარაკებები კონსტრუქციულ ფაზაშია, თუმცა ვაშინგტონი პოზიციას არ დათმობს. პრეზიდენტის თქმით, ირანის პორტების ბლოკადა ძალაში დარჩება მანამ, სანამ მხარეებს შორის საბოლოო სამშვიდობო შეთანხმება არ გაფორმდება.

მკაცრი პირობები შეთანხმებისთვის

ტრამპმა სოციალურ ქსელ Truth Social-ში დაწერა, რომ პროცესი არ უნდა დაჩქარდეს და შეცდომების დაშვება დაუშვებელია. მისი განმარტებით, მიუხედავად ურთიერთობების გაუმჯობესებისა, ირანისთვის წითელი ხაზი უცვლელი რჩება: ქვეყანამ არ უნდა შექმნას ბირთვული იარაღი.

„ბლოკადა სრული სახით დარჩება და იმოქმედებს მანამ, სანამ მიღწეული, დასრულებული და ხელმოწერილი არ იქნება შეთანხმება“, — აღნიშნა ტრამპმა.

რა დევს მოლაპარაკებების მაგიდაზე?

მედიაპლატფორმა Axios-ის მიერ გავრცელებული ინფორმაციით, მემორანდუმის პროექტი 60-დღიან ზავს ითვალისწინებს. შეთანხმების პირობები მოიცავს:

  • ჰორმუზის სრუტის გახსნას და ნაღმებისგან გაწმენდას;
  • გემების თავისუფალ მიმოსვლას გადასახადების გარეშე;
  • ირანის ვალდებულებას, შეწყვიტოს ურანის გამდიდრების პროგრამა;
  • მაღალგამდიდრებული ურანის მარაგების ქვეყნიდან გატანას.

საპასუხოდ, აშშ მზად არის მოხსნას პორტების ბლოკადა და დაუშვას გამონაკლისები სანქციებში, რაც ირანს ნავთობის ექსპორტის საშუალებას მისცემს. ამასთან, შეთანხმება ითვალისწინებს ლიბანში ომის შეწყვეტას ისრაელსა და ჰეზბოლას შორის.

რეგიონული თანამშრომლობა

ტრამპმა მადლობა გადაუხადა ახლო აღმოსავლეთის ქვეყნებს თანამშრომლობისთვის. მისი თქმით, ისრაელთან ურთიერთობების დარეგულირების შემდეგ ეს კავშირები კიდევ უფრო გამყარდება. პრეზიდენტმა არ გამორიცხა, რომ სამომავლოდ ირანიც გახდეს ამ რეგიონული თანამშრომლობის ნაწილი.

ამ ეტაპზე აშშ მზადაა, 60-დღიანი პერიოდის განმავლობაში აწარმოოს მოლაპარაკებები აქტივების განბლოკვისა და სანქციების სრული გაუქმების დეტალებზე.