ფეხბურთის სამყარო კიდევ ერთი ტრაგიკული ამბის მოწმე გახდა. 21 წლის ნიგერიელი ფეხბურთელი ვიქტორ უდო, რომელიც პერსპექტიულ ტალანტად მიიჩნეოდა, ნიგერიის დედაქალაქ აბუჯაში გარდაიცვალა.

უდოს გარდაცვალების შესახებ ინფორმაცია თავდაპირველად უცხოურმა მედიამ გაავრცელა. ამ ეტაპზე ოფიციალური დასკვნა ფეხბურთელის გარდაცვალების მიზეზთან დაკავშირებით არ არსებობს. საქმის გარემოებები ბუნდოვანია, რის გამოც სხვადასხვა ვერსია ვრცელდება.

გაურკვეველი გარემოებები

არაოფიციალური ცნობებით, ერთ-ერთ ვერსიად მოწამვლა განიხილება. ვრცელდება ინფორმაცია, რომ შესაძლოა ადგილი ჰქონდა საკვებით ან სასმელით მოწამვლას, თუმცა აღნიშნული ვერსია ამ დროისთვის დაუდასტურებელია და ოფიციალურ უწყებებს საქმეზე განცხადება არ გაუკეთებიათ.

კარიერული გზა

ვიქტორ უდო ევროპულ ფეხბურთში ანტვერპენის აკადემიის გავლით მოხვდა. მან თავი სწორედ იქ გამოიჩინა, რის შემდეგაც ინგლისურმა „საუთჰემპტონმა“ ახალგაზრდა ნიგერიელი თავის რიგებში მიიწვია. კლუბმა უკვე გამოთქვა მწუხარება ყოფილი მოთამაშის გარდაცვალების გამო და მის ოჯახს სამძიმარი გამოუცხადა.

ბოლო პერიოდში უდო კარიერის განვითარებას ჩეხეთში ცდილობდა. 2025 წლის ოქტომბერში მან სამწლიანი კონტრაქტი გააფორმა ჩეხურ კლუბ „ბუდეიოვიცესთან“. ეს ტრანსფერი ფეხბურთელის კარიერაში ახალი ეტაპის დასაწყისად მიიჩნეოდა.

„საუთჰემპტონი“ ღრმა მწუხარებას გამოთქვამს ვიქტორ უდოს გარდაცვალების გამო. ჩვენი ფიქრები ახლა მისი ოჯახის წევრებთან და ახლობლებთანაა“, - ნათქვამია ინგლისური კლუბის ოფიციალურ განცხადებაში.

ამჟამად ნიგერიაში შესაბამისი პროცედურები მიმდინარეობს, რათა დადგინდეს, რა გახდა 21 წლის სპორტსმენის უეცარი გარდაცვალების მიზეზი.