იტალიის ლომბარდიის რეგიონი გახდა პირველი ადმინისტრაციული ერთეული ქვეყანაში, რომელმაც მონაცემთა ცენტრების მშენებლობის წესები მკაცრად დაარეგულირა. 26 მაისს მიღებული ახალი კანონი მიზნად ისახავს, შეზღუდოს ტექნოლოგიური გიგანტების მიერ მწვანე და სასოფლო-სამეურნეო მიწების ათვისება.

სამჯერ გაზრდილი გადასახადები

რეგიონული საბჭოს გადაწყვეტილებით, მონაცემთა ცენტრების მშენებლობისთვის დაწესებული სამშენებლო გადასახადები რადიკალურად იცვლება. სასოფლო-სამეურნეო ზონებში გადასახადი 100%-ით, ხოლო დაცულ პარკებსა და მწვანე ზონებში 200%-ით იზრდება.

თავდაპირველი პროექტი გაცილებით რბილი იყო და 50-75%-იან ზრდას ითვალისწინებდა, თუმცა საბოლოო კენჭისყრაზე, „ლიგას“ პარტიის ინიციატივით, ტარიფები მნიშვნელოვნად გამკაცრდა. ეს ნაბიჯი პასუხია მონაცემთა ცენტრების ბუმზე, რომელიც რეგიონში ხშირად გაუაზრებელი გეგმებით მიმდინარეობდა.

რატომ ლომბარდია?

ლომბარდია იტალიის მასშტაბით მონაცემთა ცენტრების მშენებლობის მთავარი ჰაბია. სტატისტიკის თანახმად, იტალიაში დაგეგმილი 22 მილიარდი ევროს ინვესტიციების ნახევარი სწორედ ამ რეგიონზე მოდის. მხოლოდ მილანის მეტროპოლიაში 33 ცენტრია მოქმედი, 10 შენდება, ხოლო 23 პროექტი შეფასების ეტაპზეა.

„ჩვენ არ შეგვიძლია ტექნოლოგიური განვითარებისა და დასაქმების შეჩერება, რადგან ხელოვნური ინტელექტის რბოლა რეალობაა. თუმცა, ვალდებულნი ვართ, ვაკონტროლოთ ტერიტორიის გადაჭარბებული ექსპლუატაცია“, — განაცხადა რეგიონულმა მრჩეველმა მასიმო სერტორიმ.

ბიუროკრატიული გამარტივება

ახალი კანონი მხოლოდ შეზღუდვებს არ გულისხმობს. ინვესტორებისთვის, რომლებიც მონაცემთა ცენტრებს უკვე არსებულ, მიტოვებულ სამრეწველო ზონებში განათავსებენ, დამატებითი ტვირთი არ დაწესდება. პირიქით, ხელისუფლება ბიუროკრატიულ გამარტივებას ჰპირდება მათ, ვინც დეგრადირებული ინფრასტრუქტურის რეაბილიტაციას მოახდენს.

ენერგეტიკული გამოწვევები

რეგიონული მთავრობა ენერგომოხმარების რისკებსაც აფასებს. მიუხედავად იმისა, რომ იტალიის მასშტაბით 30 გიგავატზეა მოთხოვნა, ლომბარდიის ხელისუფლება რეალისტურ პროექტებზე დაყრდნობით, მაქსიმუმ 2 გიგავატის ავტორიზაციას გეგმავს. პროცესში ჩაერთვება ენერგეტიკული კომპანია Terna, რომელიც ენერგიის ხელმისაწვდომობასა და განაწილებას გააკონტროლებს.

ოპოზიცია კანონს მიესალმება, თუმცა აცხადებს, რომ ეს მხოლოდ დროებითი ზომაა. დემოკრატიული პარტიის წარმომადგენლის, მატეო პილონის თქმით, ნიადაგის დაცვისთვის საჭიროა არა მხოლოდ რეგიონული, არამედ მკაცრი ეროვნული საკანონმდებლო ჩარჩო, რომელიც მელონის მთავრობას ჯერჯერობით არ შეუმუშავებია.