60 წლის კანადელმა კენეთ ლოუმ ონტარიოს სასამართლოში დანაშაული აღიარა. ყოფილმა შეფ-მზარეულმა 14 ადამიანის თვითმკვლელობამდე მიყვანის ბრალდება დაადასტურა, რაც პროკურატურასთან გაფორმებული საპროცესო შეთანხმების ნაწილია. ამ შეთანხმების შედეგად, ბრალდების მხარემ მის მიმართ წაყენებული გაცილებით მძიმე მუხლი — განზრახ მკვლელობა — მოხსნა.

გლობალური ქსელი და 41 ქვეყანა

გამოძიების ცნობით, ლოუ წლების განმავლობაში მართავდა ვებგვერდებს, სადაც მომხმარებლებს თვითმკვლელობისთვის საჭირო ნივთიერებებსა და აღჭურვილობას სთავაზობდა. სამართალდამცავების ინფორმაციით, მან მსოფლიოს 41 ქვეყანაში დაახლოებით 1200 ამანათი გააგზავნა. მათ შორის 100-ზე მეტი დიდი ბრიტანეთის მისამართზე აღმოჩნდა.

საქმეში 11 ქვეყნის სამართალდამცავი უწყება იყო ჩართული, მათ შორის იტალიის, აშშ-ისა და გაერთიანებული სამეფოს საგამოძიებო ორგანოები. ლოუს დაკავება 2023 წლის მაისში, „The Times“-ის ჟურნალისტური გამოძიების შემდეგ მოხდა, სადაც ჟურნალისტმა თავი მყიდველად გაასაღა და ლოუსგან პირდაპირი ინსტრუქციები მიიღო, თუ როგორ უნდა გამოეყენებინა ნივთიერება „სიკვდილის გარანტირებისთვის“.

ბრიტანელი ოჯახების პროტესტი

მიუხედავად კანადური სასამართლოს გადაწყვეტილებისა, დიდი ბრიტანეთის პროკურატურამ უარი განაცხადა ლოუსთვის ბრალის წაყენებაზე. ბრიტანული მხარის მტკიცებით, 73 ბრიტანელის გარდაცვალება უშუალოდ ლოუს მიერ გაყიდულ ნივთიერებებს უკავშირდება. თუმცა, „სამართლებრივი სირთულეების“ გამო, ბრიტანელი პროკურორები საქმის კანადურ იურისდიქციაში დატოვებას ამჯობინებენ.

დაღუპულთა ოჯახები, მათ შორის დევიდ პარფეტი, რომლის 22 წლის ვაჟი თომასიც ლოუს მომხმარებელი იყო, გადაწყვეტილებით უკმაყოფილონი არიან. პარფეტი მოითხოვს, რომ ბრიტანეთის მთავრობამ საჯარო გამოძიება დაიწყოს, რადგან მისი თქმით, სახელმწიფო ვერ ახერხებს მოქალაქეების სიცოცხლის დაცვას და დანაშაულებრივი სქემების აღკვეთას.

„თომი იყო ადამიანი, რომელიც ცხოვრების სიხარულს ყველგან ხედავდა. მასთან ერთად 2026 წლის მსოფლიო ჩემპიონატის ყურების შესაძლებლობა დავკარგე“, — აცხადებს დაღუპულის მამა.

კანადის კანონმდებლობით, თვითმკვლელობაში დახმარებისთვის გათვალისწინებული მაქსიმალური სასჯელი 14 წლამდე პატიმრობას ითვალისწინებს. ლოუ ამჟამად ონტარიოს საპატიმროში რჩება, სადაც განაჩენის გამოცხადებას ელოდება.