ვაშინგტონის ერთ-ერთი ყველაზე ცნობილი ღირსშესანიშნაობა, ლინკოლნის მემორიალის წინ მდებარე „რეფლექთინგ პული“ (Reflecting Pool), კვირების განმავლობაში მიმდინარე სარემონტო სამუშაოების შემდეგ ისევ წყლით შეივსო. თუმცა, შედეგი საზოგადოების მოლოდინს არ დაემთხვა.

პროექტი, რომელიც აუზის ზედაპირის განახლებასა და წყლის გაჟონვის პრობლემების აღმოფხვრას ისახავდა მიზნად, აშშ-ის პრეზიდენტმა დონალდ ტრამპმა აპრილის დასაწყისში დააანონსა. გეგმის მიხედვით, აუზის ფსკერი სპეციალური „ამერიკული დროშის ლურჯი“ ფერით უნდა შეეღებათ.

საბოლოო ჯამში, ვიზიტორების ნაწილი უკმაყოფილოა. ტურისტები, რომლებიც მემორიალს სტუმრობენ, აღნიშნავენ, რომ აუზი ახლა უფრო შავი ფერისაა, ვიდრე ლურჯი. „ეს შავად გამოიყურება“, — აცხადებენ დამთვალიერებლები, რომლებიც წყლის ახალ შეფერილობას აკრიტიკებენ.

ფინანსური თვალსაზრისით, პროექტი თავდაპირველად გაცილებით იაფი იყო. ფედერალური ჩანაწერების მიხედვით, დონალდ ტრამპი თავდაპირველად 2 მილიონი დოლარის ბიუჯეტზე საუბრობდა, თუმცა რეალურად ხარჯებმა 13.1 მილიონი დოლარი შეადგინა. გაზრდილი ბიუჯეტი და შედეგი, რომელიც ვიზიტორების ნაწილისთვის ესთეტიკურად მიუღებელი აღმოჩნდა, ამერიკულ მედიაში განხილვის საგანი გახდა.

სარემონტო სამუშაოების ფარგლებში აუზის ფსკერი მთლიანად შეიცვალა, რათა მრავალწლიანი ტექნიკური პრობლემები აღმოეფხვრათ. მიუხედავად იმისა, რომ ტექნიკურად აუზი მწყობრშია, ვიზუალური მხარე კვლავაც კითხვის ნიშნებს აჩენს.