გადახდების გლობალური ლიდერი Visa ხელოვნური ინტელექტის სფეროში საკუთარ გავლენას აძლიერებს. კომპანიამ ოფიციალურად დაადასტურა ინვესტიცია AI კოდირების პოპულარულ პლატფორმა Replit-ში. მიუხედავად იმისა, რომ გარიგების ფინანსური დეტალები გასაჯაროებული არ არის, ეს ნაბიჯი ტექნოლოგიურ სექტორში „აგენტური გადახდების“ (agentic payments) განვითარებისკენ გადადგმულ მნიშვნელოვან ნაბიჯად ითვლება.

რა არის აგენტური გადახდები?

აგენტური გადახდები გულისხმობს სამყაროს, სადაც ხელოვნური ინტელექტის აგენტები მომხმარებლის სახელით ყიდულობენ და ყიდიან პროდუქტებსა თუ მომსახურებებს. Visa და Replit ერთობლივად მუშაობენ იმაზე, რომ ეს პროცესი დეველოპერებისთვის მაქსიმალურად გამარტივდეს. გეგმის მიხედვით, პროგრამისტებს შეეძლებათ, თავიანთ აპლიკაციებში გადახდის სისტემები ისე დანერგონ, რომ პლატფორმიდან გაუსვლელად შეძლონ მომხმარებლებისთვის ტრანზაქციების შეთავაზება.

Visa-ს როლი და უსაფრთხოების პროტოკოლი

პარტნიორობა მოიცავს Visa Intelligent Commerce-ის გამოყენებას, რომელიც AI-ზე დაფუძნებულ გადახდებს უზრუნველყოფს. გარდა ამისა, კომპანიები განიხილავენ „Visa Trusted Agent Protocol“-ის ინტეგრაციას. ეს სისტემა აგენტებს საშუალებას მისცემს, დაადასტურონ საკუთარი ვინაობა და მიზანი, რათა შესრულებული გადახდები იყოს სრულად დაცული და სანდო.

Replit-ის დამფუძნებლის, ამჯად მასადის თქმით, Visa-სთან თანამშრომლობა ხაზს უსვამს მათი პლატფორმის უსაფრთხოებასა და მასშტაბურობას.

Replit-ის ზრდა და კორპორატიული სეგმენტი

Replit-ისთვის ეს წელი განსაკუთრებით წარმატებულია. კომპანიის საბაზრო ღირებულებამ სულ რაღაც ექვს თვეში 3-დან 9 მილიარდ დოლარამდე მოიმატა. ამჟამად პლატფორმა ნერგავს თვითმომსახურების საწარმოო წვდომას, რაც კომპანიებს საშუალებას აძლევს, გააფორმონ კონტრაქტები 200 000 დოლარამდე დამატებითი ბიუროკრატიული პროცედურების გარეშე.

კომპანია აქტიურად იზიდავს დიდ კორპორაციებს. Visa-ს 1 000-ზე მეტი თანამშრომელი უკვე იყენებს Replit-ს პროტოტიპირებისა და განვითარებისთვის. მასადის განცხადებით, კლიენტები, რომლებიც ერთხელ გადადიან Replit-ის სრულ ეკოსისტემაზე, იშვიათად ტოვებენ მას, რადგან პლატფორმა უზრუნველყოფს აპლიკაციების სწრაფ და უსაფრთხო გადაყვანას წარმოების რეჟიმში.