სტივენ სპილბერგისთვის კითხვა „მარტო ვართ თუ არა სამყაროში?“ უკვე ოთხი ათეული წელია, შემოქმედების მთავარ ღერძს წარმოადგენს. „E.T.“-სა და „მესამე სახის ახლო კონტაქტების“ შემდეგ, 79 წლის რეჟისორი კვლავ უბრუნდება ამ თემას თავისი ახალი სამეცნიერო ფანტასტიკური თრილერით — „Disclosure Day“.

ფილმი მოგვითხრობს სამყაროზე, რომელიც დიდ აღმოჩენას ელოდება: მტკიცებულებას, რომ არამიწიერი ინტელექტი არსებობს და ის დიდი ხანია, ჩვენს თვალწინ იმალება. მთავარ როლებში მაყურებელი ემილი ბლანტს, ჯოშ ო'კონორს, კოლმან დომინგოსა და კოლინ ფერთს იხილავს.

ლონდონში, ფილმის პრემიერაზე საუბრისას, სპილბერგმა BBC-ს განუცხადა, რომ წლების განმავლობაში მისი შეხედულება არამიწიერი სიცოცხლის შესახებ ბევრად უფრო რეალისტური გახდა. „ბევრი საიდუმლოა, რომლებიც ჯერ კიდევ არ გამჟღავნებულა, მაგრამ ახლა უფრო ოპტიმისტურად ვარ განწყობილი იმის მიმართ, რომ ადამიანები შეძლებენ იმის აღმოჩენას, რისი ნახვის უფლებაც აქამდე არ გვქონდა“, — აღნიშნა რეჟისორმა.

ფილმის სიუჟეტის ცენტრში მეტეოროლოგი მარგარეტ ფეირჩაილდი (ემილი ბლანტი) და კიბერუსაფრთხოების ექსპერტი დენიელ კელნერი (ჯოშ ო'კონორი) არიან. ისინი აღმოაჩენენ მტკიცებულებებს, რომ მთავრობები და კორპორაციები წლების განმავლობაში მალავდნენ სიმართლეს უცხოპლანეტელების არსებობის შესახებ.

ემილი ბლანტის თქმით, ფილმის ერთ-ერთი მთავარი გზავნილი შიშის დაძლევაა. „მათემატიკურად წარმოუდგენელია, რომ ჩვენ ერთადერთი ცივილიზაცია ვართ. უცხოპლანეტელების აღმოჩენა უნდა გვაოცებდეს და არა გვაშინებდეს“, — ამბობს მსახიობი.

თავის მხრივ, ჯოშ ო'კონორი ფიქრობს, რომ არამიწიერი ცივილიზაციის აღმოჩენამ შესაძლოა დედამიწაზე არსებული პოლიტიკური და სოციალური დაპირისპირება შეამციროს. მისი აზრით, როცა ადამიანებს შორის გაუგებრობაა, გარედან მოსულმა მოვლენამ შესაძლოა დედამიწელები გააერთიანოს.

სპილბერგი ხაზს უსვამს, რომ „Disclosure Day“ პირველ რიგში ადამიანურობის, ნდობისა და ერთიანობის შესახებ არის. რეჟისორი კატეგორიულად ეწინააღმდეგება ხელოვნური ინტელექტის გამოყენებას შემოქმედებით პროცესში, თუმცა აღიარებს მის სარგებლიანობას ადმინისტრაციულ და ტექნიკურ საკითხებში.

კითხვაზე, აღმოვაჩენთ თუ არა არამიწიერ სიცოცხლეს ჩვენს სიცოცხლეშივე, სპილბერგმა მოკლედ და მტკიცედ უპასუხა: „დიახ“.