დიდ ბრიტანეთში, დევონის საგრაფოს ტერიტორიაზე, სამხედრო ავიაციისთვის ტრაგიკული შემთხვევა მოხდა. სასწავლო ფრენის შესრულებისას სამეფო საზღვაო ძალების კუთვნილი Merlin Mk4 ტიპის ვერტმფრენი ჩამოვარდა, რასაც სამი სამხედრო მოსამსახურის სიცოცხლე ემსხვერპლა.

BBC-ის ინფორმაციით, ინციდენტი ოკჰემპტონის მახლობლად, საურტონ დაუნის რაიონში დაფიქსირდა. შემთხვევის ადგილზე დაუყოვნებლივ გაიგზავნენ საგანგებო და სამაშველო სამსახურები, რომლებიც სამძებრო-სამაშველო ოპერაციაში ჩაერთნენ.

ღრმა მწუხარებით ვადასტურებთ, რომ სასწავლო მანევრის დროს სამეფო საზღვაო ძალების სამი წევრი დაიღუპა. ჩვენი ფიქრები და თანაგრძნობა მათ ოჯახებსა და ახლობლებს ეკუთვნით, – ნათქვამია სამხედრო უწყების ოფიციალურ განცხადებაში.
3 ფოტო — დააჭირე გასადიდებლად

მომხდარს დიდი ბრიტანეთის პრემიერ-მინისტრი კირ სტარმერი გამოეხმაურა. მან შემთხვევას „უკიდურესად ტრაგიკული“ უწოდა და დაღუპულთა ოჯახებს სამძიმარი გამოუცხადა.

სამეფო საზღვაო ძალების მეთაურმა, გენერალმა გვინ ჯენკინსმა განაცხადა, რომ მომხდარი მთელი საზღვაო ძალებისთვის მძიმე დარტყმაა. ამ დროისთვის ადგილზე მუშაობენ ექსპერტები, რომლებიც ავიაკატასტროფის გამომწვევ მიზეზებს სწავლობენ.

ამ ეტაპზე გამოძიება მიმდინარეობს, რათა დადგინდეს, რა გახდა ტექნიკური თუ სხვა სახის შეფერხების მიზეზი, რომელმაც ფატალური შედეგი გამოიწვია. Merlin Mk4-ის ტიპის ვერტმფრენები ბრიტანეთის სამხედრო-საზღვაო ფლოტის ერთ-ერთ ძირითად საჰაერო საშუალებას წარმოადგენს.