„დიდი შვიდეულის“ (G7) წევრი ქვეყნები ერთსულოვანნი არიან რუსეთის წინააღმდეგ სანქციების გამკაცრების საკითხში. უკრაინის პრეზიდენტის, ვოლოდიმირ ზელენსკის თქმით, პარტნიორები აცნობიერებენ, რომ კრემლს ომის დასრულების სურვილი არ გააჩნია, ამიტომ მოსკოვზე ეკონომიკური და პოლიტიკური ზეწოლა აუცილებელია.

ზელენსკიმ ლიდერებთან შეხვედრისას დაგმო რუსეთის მიერ უკრაინის სამოქალაქო ინფრასტრუქტურაზე, მშვიდობიან მოსახლეობასა და ისტორიულ ძეგლებზე, მათ შორის კიევ-პეჩერის ლავრაზე განხორციელებული თავდასხმები. პრეზიდენტმა შეხვედრაზე წარადგინა მტკიცებულებები, მათ შორის ფოტოები, რომლებიც რუსული აგრესიის შედეგად გამოწვეულ ხანძრებსა და სამაშველო ოპერაციებს ასახავს.

„ყველა მიიჩნევს, რომ ომი უნდა შეჩერდეს. თუმცა, პუტინის პოზიცია ცხადია — მას კონფლიქტის დასრულება არ სურს, ამიტომ მისი იძულებაა საჭირო, პირველ რიგში კი სანქციების გზით“, — განაცხადა ზელენსკიმ.

3 ფოტო — დააჭირე გასადიდებლად

G7-ის ქვეყნებმა უკრაინისთვის მტკიცე მხარდაჭერა დაადასტურეს. მოკავშირეები არა მხოლოდ არსებულ სანქციებს აძლიერებენ, არამედ აქტიურად მუშაობენ უკრაინის თავდაცვის შესაძლებლობების გაფართოებაზე. პრეზიდენტის თქმით, პარტნიორები მზად არიან, მხარი დაუჭირონ უკრაინას მომავალი ზამთრის პერიოდშიც, განსაკუთრებით ენერგეტიკული და კრიტიკული ინფრასტრუქტურის მდგრადობის უზრუნველყოფის მიზნით.

განსაკუთრებული ყურადღება დაეთმო აშშ-ის პრეზიდენტთან გამართულ მოლაპარაკებებს. მხარეებმა განიხილეს ანტიბალისტიკური სისტემებისა და რაკეტების წარმოების ლიცენზიის მიღების პერსპექტივები. უკრაინა მიზნად ისახავს საკუთარი თავდაცვითი ინდუსტრიის შესაძლებლობების გაზრდას, რათა უკეთ გაუმკლავდეს რუსეთის მასირებულ სარაკეტო და დრონებით თავდასხმებს.