ისრაელი და ლიბანი ცეცხლის შეწყვეტის რეჟიმის ამოქმედებაზე ოფიციალურად შეთანხმდნენ. აშშ-ის სახელმწიფო დეპარტამენტის მიერ გავრცელებული ერთობლივი განცხადების თანახმად, მხარეები მოლაპარაკებების ბოლო რაუნდის შემდეგ კონკრეტულ ნაბიჯებზე შეჯერდნენ.

შეთანხმების ძალაში შესვლა რამდენიმე პირობას უკავშირდება. მთავარი მოთხოვნა „ჰეზბოლას“ მხრიდან სარაკეტო და საარტილერიო თავდასხმების სრულად შეწყვეტაა. ასევე, აუცილებელია ყველა მებრძოლის სამხრეთ ლიბანიდან გაყვანა. ისრაელმა მკაფიოდ დააფიქსირა, რომ საკუთარი ტერიტორიული მთლიანობის დასაცავად „ჰეზბოლას“ ინფრასტრუქტურის სრული დემონტაჟი აუცილებელი პირობაა.

მოლაპარაკებების პროცესი მას შემდეგ გააქტიურდა, რაც ისრაელის ხელისუფლებამ ლიბანში სამხედრო ოპერაციების გაფართოების შესახებ გააკეთა განაცხადი. ეს ნაბიჯი პირდაპირ საფრთხეს უქმნიდა აშშ-სა და ირანს შორის მიმდინარე დიპლომატიურ დიალოგს.

მხარეები შეთანხმდნენ საპილოტე ზონების შექმნის დაჩქარებაზე. ამ ტერიტორიებს ექსკლუზიურად ლიბანის შეიარაღებული ძალები გააკონტროლებენ, რათა გამოირიცხოს ნებისმიერი არასახელმწიფოებრივი შეიარაღებული დაჯგუფების ყოფნა. თუმცა, ამ ზონების ამოქმედების ზუსტი ვადები ამ ეტაპზე განსაზღვრული არ არის.

3 ფოტო — დააჭირე გასადიდებლად

22 ივნისიდან ისრაელი და ლიბანი პოლიტიკურ და უსაფრთხოების საკითხებზე დიალოგს განაახლებენ. მიზანი ყოვლისმომცველი შეთანხმების მიღწევაა, რომელშიც აშშ კვლავ შუამავლის როლს შეასრულებს. ლიბანმა აიღო ვალდებულება, აშშ-ის დახმარებით გააძლიეროს საკუთარი არმიის შესაძლებლობები, რათა ქვეყნის მასშტაბით ეფექტიანი კონტროლი დაამყაროს.

ერთობლივ განცხადებაში მხარეებმა ასევე დაგმეს ირანის ქმედებები რეგიონში. აღინიშნა, რომ ირანის მიერ მოკავშირეების მხარდაჭერა და აგრესიული პოლიტიკა ახლო აღმოსავლეთში სტაბილურობას სერიოზულ საფრთხეს უქმნის.