საქართველოს პრემიერ-მინისტრი ირაკლი კობახიძე ქართულ-ამერიკულ ურთიერთობებზე საუბრისას აცხადებს, რომ გასული წლების განმავლობაში არსებული დაძაბულობის მთავარი მიზეზი აშშ-ის წინა ადმინისტრაციის არასწორი მიდგომები იყო. პრემიერის თქმით, ოფიციალური ვაშინგტონის მხრიდან ადგილი ჰქონდა ზეწოლასა და შანტაჟს.

„თუ რაიმე გაფუჭდა ქართულ-ამერიკულ ურთიერთობებში, ეს პროცესი 100%-ით წინა ადმინისტრაციის პოლიტიკამ განაპირობა. ჩვენ მზად ვართ, განვიხილოთ ყველა დეტალი, რომელიც სტრატეგიული პარტნიორობის აღდგენას უკავშირდება, თუმცა ეს პროცესი სამართლიანობის პრინციპს უნდა ეფუძნებოდეს“, - განაცხადა კობახიძემ.

3 ფოტო — დააჭირე გასადიდებლად

მთავრობის მეთაურმა ხაზი გაუსვა, რომ საქართველო სუვერენული სახელმწიფოა და მას სკოლის მოსწავლის პოზიციიდან ვერავინ ესაუბრება. მისი თქმით, ქვეყანამ ღირსების დაცვის საფუძველზე შეძლო იმ უმძიმესი რისკების თავიდან აცილება, რასაც წინა ადმინისტრაციის მოთხოვნები ატარებდა.

კობახიძის განმარტებით, ოპოზიციის დისკრედიტაციის ფონზე, ამერიკელი მაღალჩინოსნების განცხადებებს შიდაპოლიტიკური მნიშვნელობა ნაკლებად აქვს. მთავრობა კი, ამერიკულ ადმინისტრაციასთან თანამშრომლობის გაგრძელების იმედს ინარჩუნებს.

„ჩვენ ოპტიმიზმით ვუყურებთ იმ გზავნილებს, რომლებიც საქართველოში ვიზიტის დროს მოვისმინეთ. გვჯერა, რომ სტრატეგიული პარტნიორობის განახლება შესაძლებელია, თუმცა ეს მხოლოდ სამართლიანი მიდგომებით მოხდება“, - დასძინა პრემიერმა.