5 ივნისს კლასიკური მუსიკის სამყაროს ერთ-ერთმა ყველაზე გამორჩეულმა ფიგურამ, მარტა არგერიხმა 85 წლის იუბილე აღნიშნა. ბუენოს-აირესში დაბადებული არტისტი დღესაც ინარჩუნებს სტატუსს, როგორც ერთ-ერთი ყველაზე გავლენიანი პიანისტი.

არგერიხის მუსიკალური ნიჭი ადრეულ ასაკში გამოვლინდა. სამი წლისამ ფორტეპიანოზე დაკვრა დაიწყო, ხოლო რვა წლის ასაკში უკვე ორკესტრთან ერთად შეასრულა მოცარტის მეოცე საფორტეპიანო კონცერტი. მისი ბავშვობა და მუსიკალური ჩამოყალიბება დაკავშირებულია ებრაელი ემიგრანტების ოჯახთან, რომლებმაც არგენტინაში დაიდეს ბინა.

1955 წელს არგერიხის ოჯახი ვენაში გადავიდა. ეს იყო გარდამტეხი პერიოდი, როდესაც ევროპულმა მუსიკალურმა წრეებმა პატარა პიანისტის ტალანტი აღმოაჩინეს. მის განვითარებაზე ზრუნავდნენ ისეთი მუსიკოსები, როგორებიც იყვნენ აბიმ სიმონი და შტეფან აშკენაზი.

არგერიხის მუსიკალურ აზროვნებაზე უდიდესი გავლენა მოახდინეს ფრიდრიხ გულდამ და არტურო ბენედეტი მიქელანჯელიმ. სწორედ ლუგანოში, სადაც დღეს არგერიხი ცხოვრობს და საკუთარ ფესტივალს ხელმძღვანელობს, განისვენებს მისი მასწავლებელი, მიქელანჯელი.

თექვსმეტი წლის ასაკში მან საერთაშორისო აღიარება მოიპოვა, როდესაც ზედიზედ გაიმარჯვა ჟენევისა და ფერუჩო ბუზონის სახელობის კონკურსებში. ამას მოჰყვა ტრიუმფი შოპენის სახელობის კონკურსზე, რამაც მისი კარიერა ახალ საფეხურზე აიყვანა.

60-იანი წლებიდან მოყოლებული, არგერიხის შესრულება ახალ სტანდარტად იქცა. მის მიერ ჩაწერილი შოპენის, ბრამსის, ლისტისა და რაველის ნაწარმოებები დღემდე საეტაპო ნამუშევრებად ითვლება. მისი ტექნიკა, რომელიც გამოირჩევა გამორჩეული სისწრაფითა და ემოციური ინტენსივობით, კრიტიკოსების მუდმივ აღფრთოვანებას იწვევს.