საქართველოს ყოფილი პრეზიდენტი მიხეილ სააკაშვილი ოპოზიციურ სპექტრს მკაცრად აკრიტიკებს. სოციალურ ქსელში გამოქვეყნებულ მიმართვაში სააკაშვილი აცხადებს, რომ ოპოზიციის დიდი ნაწილი ხელისუფლების მიმართ „მხვეწნელის“ როლშია, რაც, მისი თქმით, არაეფექტური და დამამცირებელია.

სააკაშვილი მიიჩნევს, რომ ბიძინა ივანიშვილის ხელისუფლებაზე არ მოქმედებს არანაირი მუდარა და ჰუმანიზმის მცდელობას ისინი მხოლოდ სისუსტედ აღიქვამენ. „უნდა შევწყვიტოთ მოწკმუტუნე მხვეწნელის როლში ყოფნა. ეს ხვეწნა-მუდარა მხოლოდ სადისტურ სიამოვნებას ანიჭებს დიქტატორს“, — წერს ყოფილი პრეზიდენტი.

სასამართლო და პირადი გამოცდილება

სააკაშვილი დეტალურად იხსენებს 25 მაისის სასამართლო პროცესს, სადაც, მისი თქმით, წინასწარ დაგეგმილი პროვოკაცია მოეწყო. ყოფილი პრეზიდენტი აღწერს ბადრაგთან ფიზიკურ დაპირისპირებას და მოსამართლის ქმედებებს, რომელმაც მას სიტყვის უფლება არ მისცა.

„მიუხედავად ძალებში დიდი უთანასწორობისა, მე კარგად შევეწინააღმდეგე. ეს ყველაფერი გაკეთდა იმისთვის, რომ 26 მაისის წინ დავეჩაგრე“, — აცხადებს სააკაშვილი. ის ხაზს უსვამს, რომ წინააღმდეგობა აუცილებელია არა მხოლოდ პოლიტიკურ, არამედ ყოველდღიურ დონეზე.

ორგანიზებული წინააღმდეგობის საჭიროება

მიხეილ სააკაშვილის აზრით, ქვეყანას მხოლოდ ორგანიზებული წინააღმდეგობა უშველის. ის მოუწოდებს მოქალაქეებს, ნუ დაელოდებიან გათავისუფლებას უცხოეთიდან — ამერიკიდან, ევროპიდან თუ უკრაინიდან. მისივე თქმით, თავისუფლების ღირსი ის ერი არ არის, რომელიც გამუდმებით სხვის დახმარებას ელოდება.

„ერთადერთი, რითაც შევძლებთ თავის დახსნას, არის გაბედული ადამიანების მიერ ორგანიზებული წინააღმდეგობა, რომელიც შეძლებს, მოძალადეებს არ აცემინოს, არ დააჭერინოს, არ დააჩაგვრინოს თავი.“

სააკაშვილი ამბობს, რომ წინააღმდეგობის უჯრედები უნდა შეიქმნას სამეგობრო წრეებში, სამეზობლოში და შემდეგ გაფართოვდეს. მან ხაზი გაუსვა, რომ არ უნდა მოხდეს „ცხვარივით დასაკლავად წასვლა“ და აუცილებელია აქტიური მოქმედება, რათა მოძალადეებმა ვერ შეძლონ საზოგადოების დაჩაგვრა.

„ივანიშვილს ესმის მხოლოდ ერთი ენა — ორგანიზებული წინააღმდეგობიდან წარმოშობილი ძალის ენა“, — აჯამებს სააკაშვილი.