დიდმა ბრიტანეთმა სანქციების ახალი პაკეტი გამოაქვეყნა, რომელშიც საქართველოში რეგისტრირებული სამი კომპანია მოხვდა. ოფიციალური ლონდონის მტკიცებით, Arvix, Rapira და Aifory რუსეთს სანქციების გვერდის ავლის მიზნით შექმნილი კრიპტოვალუტის ბირჟების მართვაში ეხმარებოდნენ.

საქართველოს ეროვნულმა ბანკმა საკითხზე განმარტება გააკეთა. მარეგულირებლის განცხადებით, აღნიშნული სამი კომპანია ქვეყანაში არარეგისტრირებულად ფუნქციონირებდა და შესაბამისად, ისინი ეროვნული ბანკის ზედამხედველობის არეალს მიღმა იყვნენ.

რა გაარკვია ფინანსურმა პოლიციამ?

საქართველოს ფინანსთა სამინისტროს საგამოძიებო სამსახურის ცნობით, ბრიტანული სანქციების გამოცხადებამდე კომპანიების საქმიანობა უკვე გამოძიების საგანი იყო. უწყების ინფორმაციით, გამოძიებამ დაადგინა, რომ აღნიშნულ სუბიექტებს საქართველოში არანაირი აქტივი, ოფისი ან რეალური ბიზნესსაქმიანობა არ გააჩნდათ.

გამოძიების თანახმად, Aifory და Arvix ფიქტიურად იყვნენ რეგისტრირებული სხვა პირების სახელზე, თუმცა რეალურად მოსკოვიდან იმართებოდნენ. რაც შეეხება Rapira Group-ს, კომპანია დარეგისტრირებული იყო ბრიტანეთის მოქალაქის მიერ მინდობილობით და მხოლოდ რუსეთის მოქალაქეებს ემსახურებოდა.

სასამართლო განაჩენები

საგამოძიებო სამსახურის ცნობით, საქმეზე უკვე არსებობს სასამართლოს განაჩენი. 28 აპრილს მიღებული გადაწყვეტილებით, სქემის ორგანიზატორად მიჩნეულ დავით ჯინჭარაძეს 9 წლითა და 6 თვით პატიმრობა მიესაჯა. დანარჩენ სამ ბრალდებულს კი 30 000-ლარიანი ჯარიმა და პირობითი სასჯელი დაეკისრათ.

ოპოზიციის კრიტიკა

ყოფილი ეროვნული ბანკის პრეზიდენტი და ოპოზიციონერი ეკონომისტი რომან გოცირიძე ხელისუფლების პოლიტიკის მიმართ სკეპტიკურადაა განწყობილი. მისი თქმით, ეს ფაქტი ქვეყნის ფინანსური ზედამხედველობის სისტემაში არსებულ სერიოზულ ხარვეზებზე მიუთითებს.

გოცირიძის განცხადებით, კომპანიები რეგისტრირებული იყვნენ გლდანისა და ქუთაისის თავისუფალ ინდუსტრიულ ზონებში. მან გლდანის ზონა „კრიპტო-ვამპირადაც“ მოიხსენია და აღნიშნა, რომ ეს ტერიტორიები დაკავშირებულია მმართველი პარტიის დამფუძნებელ ბიძინა ივანიშვილთან და ჩინურ Hualing Group-თან.

ამ ფონზე, საქართველოში ოპერირება დაიწყო მსოფლიოს უმსხვილესმა სტეიბლკოინის ემიტენტმა Tether-მა. პრემიერ-მინისტრმა ირაკლი კობახიძემ ამ ნაბიჯს ქვეყნის საინვესტიციო სანდოობისთვის გარდამტეხი მომენტი უწოდა, თუმცა ექსპერტები ამ პარტნიორობის ხანგრძლივვადიან რისკებზე საუბრობენ.