ჩინეთში დასრულდა გახმაურებული სასამართლო საქმე, რომელიც 2020 წელს სათამაშო ინდუსტრიის ერთ-ერთი ყველაზე გავლენიანი ფიგურის, ლინ ცის მკვლელობას უკავშირდება. დამნაშავე შუ იაო, რომელმაც მილიარდერი მეწარმე მოწამლა, სიკვდილით დასაჯეს.

მკვლელობის დეტალები

საქმის მასალების მიხედვით, შუ იაომ, რომელიც ლინ ცის კომპანიაში მაღალ თანამდებობას იკავებდა, დანაშაული შურისძიების ნიადაგზე ჩაიდინა. კონფლიქტი მათ შორის მას შემდეგ დაიწყო, რაც ლინ ციმ ბიზნეს ოპერაციების მართვაში შუ ჩამოაშორა და სხვა მენეჯერები დააწინაურა.

შუ იაომ მკვლელობისთვის მზაკვრული გეგმა შეიმუშავა: მან სასიკვდილო შხამი პრობიოტიკების აბებში შენიღბა და ლინ ცის მისცა. 2020 წლის დეკემბერში, თავს შეუძლოდ იგრძნო და საავადმყოფოში გადაიყვანეს, სადაც 39 წლის მეწარმე ცხრა დღის შემდეგ გარდაიცვალა.

Netflix-ის პროექტი და კონფლიქტი

ლინ ციმ, რომელიც Yoozoo Games-ის დამფუძნებელი იყო, კომპანია საერთაშორისო ასპარეზზე გაიყვანა. ის იყო მთავარი ფიგურა ჩინური სამეცნიერო ფანტასტიკური ტრილოგიის, „3 სხეულის პრობლემის“ Netflix-ის სერიალად ადაპტირების პროცესში. ლინ ცი გარდაცვალების შემდეგ პროექტის აღმასრულებელ პროდიუსერად დაასახელეს.

სასამართლომ შუ იაოს ქმედება „უკიდურესად საძაგლად“ შეაფასა. გარდა ლინ ცის მკვლელობისა, დადგინდა, რომ შუს მოწამვლის მცდელობამ სხვა თანამშრომლებიც დააზარალა.

„სამართლიანობამ საბოლოოდ გაიმარჯვა, თუნდაც ეს დაგვიანებული იყოს“, — წერდა ერთ-ერთი დაზარალებული სოციალურ ქსელში.

Yoozoo Games-ის განცხადებით, მათთვის მართლმსაჯულების აღსრულება უმნიშვნელოვანესი იყო. კომპანიამ კიდევ ერთხელ გამოხატა მწუხარება დამფუძნებლის გარდაცვალების გამო და ხაზი გაუსვა, რომ სამართალდამცავებმა პროცესი მიუკერძოებლად წარმართეს.