ევროკავშირმა ჩინურ ონლაინ პლატფორმა Temu-ს 200 მილიონი ევროს ოდენობის ჯარიმა დააკისრა. გადაწყვეტილება ევროკომისიამ მას შემდეგ მიიღო, რაც კომპანიის პლატფორმაზე სახიფათო პროდუქტების, მათ შორის უხარისხო ელექტრო დამტენებისა და სათამაშოების რეალიზაცია გამოვლინდა.

სისტემური რისკების იგნორირება

ევროკომისიის განცხადებით, კომპანიამ ვერ უზრუნველყო სისტემური რისკების სათანადო იდენტიფიცირება და შეფასება. გამოძიება 2024 წლის ოქტომბრიდან მიმდინარეობდა, რათა დადგენილიყო, ასრულებდა თუ არა Temu „ციფრული მომსახურების აქტით“ (DSA) გათვალისწინებულ ვალდებულებებს, რომელიც „ძალიან დიდი ონლაინ პლატფორმების“ სტატუსის მქონე კომპანიებს ეკისრებათ.

დამოუკიდებელმა კვლევითმა ორგანიზაციამ ჩაატარა ე.წ. „საიდუმლო მყიდველის“ ტესტირება, რამაც შოკისმომგვრელი შედეგები აჩვენა. კერძოდ, Temu-ზე შეძენილი დამტენების დიდმა ნაწილმა ელექტროუსაფრთხოების საბაზისო ტესტები ვერ გაიარა. გარდა ამისა, საბავშვო სათამაშოებში აღმოჩნდა ქიმიური ნივთიერებები, რომლებიც დასაშვებ ნორმებს აჭარბებდა, ან ჰქონდათ ისეთი მცირე ზომის დეტალები, რომლებიც ბავშვებისთვის დახრჩობის საფრთხეს ქმნიდა.

კომპანიის პოზიცია და შემდგომი ნაბიჯები

Temu-ს წარმომადგენლებმა განაცხადეს, რომ ევროკომისიის გადაწყვეტილებას არ ეთანხმებიან და მას არაპროპორციულს უწოდებენ. კომპანიის განმარტებით, გამოვლენილი დარღვევები 2024 წლის მდგომარეობას ასახავს და არ შეესაბამება მათი სისტემების დღევანდელ სტანდარტებს.

„ჩვენ პატივს ვცემთ წესების დაცვის აუცილებლობას, თუმცა დაკისრებული ჯარიმა არ არის ადეკვატური. ამჟამად ვსწავლობთ გადაწყვეტილებას და განვიხილავთ ყველა ხელმისაწვდომ ვარიანტს“, - ნათქვამია კომპანიის ოფიციალურ განცხადებაში.

ჯარიმის გადახდის გარდა, Temu ვალდებულია, 28 აგვისტომდე წარადგინოს სამოქმედო გეგმა, სადაც დეტალურად იქნება აღწერილი, თუ როგორ აპირებს გამოვლენილი ხარვეზების აღმოფხვრას. ამის შემდეგ ევროკომისიას ორი თვე ექნება იმის გადასაწყვეტად, არის თუ არა კომპანიის მიერ შეთავაზებული ზომები საკმარისი.

ევროკავშირის ტექნოლოგიების კომისარმა, ჰენა ვირკუნენმა აღნიშნა, რომ ეს გადაწყვეტილება Temu-სთვის მკაცრი გზავნილია. აღსანიშნავია, რომ ეს „ციფრული მომსახურების აქტის“ ფარგლებში შინაარსთან დაკავშირებით დაკისრებული მეორე ჯარიმაა. პირველი შემთხვევა გასული წლის დეკემბერში მოხდა, როდესაც ილონ მასკის სოციალური ქსელი X 120 მილიონი ევროთი დაჯარიმდა.