ევერესტზე დაკარგული ნეპალელი გიდი, დავა შერპა, რომელიც გარდაცვლილად მიიჩნეოდა, ექვსდღიანი განსაცდელის შემდეგ ცოცხალი იპოვეს. მან BBC-სთან საუბარში განაცხადა, რომ სიცოცხლე ყინულის ღეჭვითა და ჯიბეში შემთხვევით აღმოჩენილი მცირე რაოდენობის შოკოლადით შეინარჩუნა.

გიდი მთიდან დამოუკიდებლად ეშვებოდა, როდესაც მას ჟანგბადი გაუთავდა. მისი თქმით, ის არ დაკარგულა, არამედ იძულებული გახდა, უკან დარჩენილიყო. 57 წლის მამაკაცი ბოლოს მთამსვლელმა კრის თრალმა ნახა, როდესაც ის 7 500 მეტრის სიმაღლეზე, მე-3 ბანაკის ზემოთ ისვენებდა.

დავა შერპა იხსენებს, რომ ჟანგბადის გათავების შემდეგ სიარული ვეღარ შეძლო. პირველი ორი დღის განმავლობაში მას არაფერი უჭამია, მოგვიანებით კი ყინულის ღეჭვა დაიწყო, რამაც კბილები დაუზიანა. მდგომარეობა კიდევ უფრო დამძიმდა, როდესაც ის ნაპრალში ჩავარდა.

ნაპრალში მყოფი გიდი დაახლოებით ორნახევარი დღის განმავლობაში იყო ჩარჩენილი. გადარჩენის იმედი ზვავმა გაუჩინა, რომელმაც ნაპრალი თოვლით ამოავსო. ამან მას საშუალება მისცა, ნაპრალიდან ამოსულიყო და გზა განეგრძო.

„თოვლზე დავაბიჯე, ავდექი და ზემოთ ავიხედე. ვიგრძენი, რომ იქიდან თავის დაღწევა შემეძლო“, – ყვება ის. გზად მას კიდევ ერთი ზვავი შეხვდა, თუმცა დანებებას არ აპირებდა. საბოლოოდ, ის ბაზისთან ახლოს ნაგვის შემგროვებელმა გუნდმა იპოვა.

მისი ოჯახი კატმანდუში უკვე ემზადებოდა დაკრძალვის რიტუალებისთვის, რადგან კომპანიამ მათ აცნობა, რომ სამაშველო ოპერაცია შეუძლებელი იყო. როდესაც გიდი ცოცხალი დაუბრუნდათ, მათთვის ეს ნამდვილი სასწაული აღმოჩნდა.

ამჟამად დავა შერპა კატმანდუს ერთ-ერთ საავადმყოფოში, ინტენსიური თერაპიის განყოფილებაში მკურნალობს. ექიმების განცხადებით, მისი მდგომარეობა სტაბილურია და დეჰიდრატაციის ნიშნები საგრძნობლად შემცირებულია.