ნაომი ოსაკა ჩოგბურთის სამყაროში საკუთარი სტილითაც ისევე გამოირჩევა, როგორც კორტზე ნაჩვენები შედეგებით. საფრანგეთის ღია პირველობაზე, როლან გაროსის წითელ გრუნტზე გამოსვლისას, 28 წლის ჩოგბურთელმა გულშემატკივრებისა და კოლეგების ყურადღება მორიგი თამამი არჩევანით მიიპყრო.

ოსაკა კორტ სუზან ლენგლენზე შავი კორსეტითა და პლისირებული ქვედაბოლოთი გამოჩნდა. თუმცა, ეს მხოლოდ შესავალი იყო. კორტზე შესვლისას მან ზედა სამოსი გაიხადა და გამოაჩინა კაშკაშა, ოქროსფერი ჩოგბურთის კაბა, რომელიც პარიზის მზის სხივების ქვეშ განსაკუთრებულად ბრწყინავდა.

ეიფელის კოშკის შთაგონება

თავად ოსაკამ აღნიშნა, რომ კოსტიუმის დიზაინი ღამის პარიზის სიმბოლოს უკავშირდება. „როდესაც პირველად ვნახე, ვიფიქრე, რომ ეიფელის კოშკს ვგავდი ღამით, როცა ის განათებულია. სიმართლე გითხრათ, ცოტა ვნერვიულობდი კიდეც, რადგან მზე კაბას ეცემოდა და ის ძალიან ირეკლავდა სინათლეს. მეშინოდა, მსაჯს კორტიდან არ გავეძევებინე“, - იხუმრა ჩოგბურთელმა მატჩის შემდეგ.

კოსტიუმის გარე ნაწილი დიზაინერმა კევინ ჟერმანიემ შექმნა, რომელიც მდგრადი მოდის მიმდევარია, ხოლო ოქროსფერი კაბა სპეციალურად Nike-ის მიერ იქნა დამზადებული. ოსაკას თქმით, გრანდ სლემის ტურნირები მისთვის ერთადერთი ადგილია, სადაც თავს არა მხოლოდ ათლეტად, არამედ „შოუბიზნესის ნაწილად“ გრძნობს.

სპორტული შედეგი და გამოხმაურება

სტილურმა დებიუტმა შედეგზე გავლენა არ მოახდინა. ოსაკამ გერმანელი ლაურა სიგემუნდი ორ სეტში, 6-3, 7-6 (7-3) დაამარცხა და ტურნირის მეორე წრეში გავიდა. მისი თამაშით აღფრთოვანებული დარჩა პირველი ჩოგანი არინა საბალენკაც, რომელმაც აღნიშნა, რომ აფასებს ოსაკას თავდაჯერებულობასა და მოდის საშუალებით საკუთარი თავის გამოხატვის სურვილს.

ყოფილი ბრიტანელი ჩოგბურთელი ანაბელ კროფტი მიიჩნევს, რომ ოსაკას მსგავსი ჩოგბურთელები განსაკუთრებულ ფსიქოლოგიურ მდგრადობას ფლობენ. მისი თქმით, ბევრი სპორტსმენი ვერ გაუძლებდა იმ მოლოდინს, რასაც ასეთი ექსტრავაგანტური ჩაცმულობა იწვევს, თუმცა ოსაკა ამას მარტივად უმკლავდება.

შეგახსენებთ, რომ 2023 წელს დედობის შემდეგ დაბრუნებულმა ნაომი ოსაკამ რეიტინგის საუკეთესო 20-ეულში ადგილი უკვე დაიბრუნა. ტურნირის შემდეგ ეტაპზე ის ხორვატ დონა ვეკიჩს დაუპირისპირდება.