ნიუ-იორკის ცენტრში, მედისონ სკვერ გარდენის მიმდებარე ტერიტორია უპრეცედენტო უსაფრთხოების ზომების მოლოდინშია. NBA-ს ფინალის მესამე მატჩს, რომელშიც „ნიუ-იორკ ნიქსი“ „სან-ანტონიო სპურსს“ დაუპირისპირდება, აშშ-ის პრეზიდენტი დონალდ ტრამპი დაესწრება. ეს ფაქტი ქალაქის ცენტრში მოძრაობის სერიოზულ შეზღუდვებსა და საპოლიციო კონტროლის გამკაცრებას იწვევს.

სერიაში „ნიქსი“ 2-0-ს იგებს და 1973 წლის შემდეგ პირველი ტიტულის მოპოვებასთან ახლოსაა. გულშემატკივრები, რომლებიც მატჩზე დასწრებას გეგმავენ, გაფრთხილებულნი არიან, რომ უსაფრთხოების პროცედურები აეროპორტის მსგავსი იქნება. აკრძალულია ჩანთების შეტანა, ხოლო ქუჩები დარბაზის მიმდებარედ გადაიკეტება.

აშშ-ის საიდუმლო სამსახურმა (Secret Service) გულშემატკივრებს მოუწოდა, არენაზე მინიმუმ ორი საათით ადრე მივიდნენ. „მოვუწოდებთ გულშემატკივრებს, მაქსიმალურად შეზღუდონ თან წასაღები ნივთების რაოდენობა, რათა შესვლის პროცესი შეუფერხებლად წარიმართოს,“ — განაცხადა საიდუმლო სამსახურის კომუნიკაციების უფროსმა ენტონი გუგლიელმიმ.

უსაფრთხოების მიზნით, გაუქმდა მატჩის საჯარო ჩვენებებიც. ქალაქის ადმინისტრაციამ და პოლიციამ უარი თქვეს Plaza33-ში დაგეგმილი ღონისძიების ნებართვაზე. მიუხედავად იმისა, რომ ეს გადაწყვეტილება პირდაპირ პრეზიდენტის ვიზიტს უკავშირდება, ოფიციალური პირები ვარაუდობენ, რომ მეოთხე მატჩისთვის საჯარო ჩვენებები აღდგება.

ტრამპი მეორე ვადით პრეზიდენტობის პერიოდში აქტიურად იყენებს სპორტულ ღონისძიებებს საჯარო გამოსვლებისთვის. მან გასულ წელს სუპერბოულზე, მოგვიანებით კი რაიდერის თასსა და ფიფას საკლუბო მსოფლიო ჩემპიონატის ფინალზე დასწრებით მიიპყრო ყურადღება. თუმცა, ასეთი ვიზიტები ხშირად იწვევს ლოჯისტიკურ შეფერხებებს, როგორც ეს სექტემბერში, აშშ-ის ღია პირველობაზე მოხდა, როდესაც გაძლიერებულმა შემოწმებებმა გულშემატკივრების შესვლა შეაფერხა.

ნიუ-იორკის მერმა ზოჰრან მამდანიმ მოუწოდა ქალაქის მოსახლეობას, იზეიმოთ პასუხისმგებლობით. ეს მოწოდება მას შემდეგ გახდა აქტუალური, რაც წინა მატჩის დროს ქუჩაში გამართულ აქციაზე 17 ადამიანი დააკავეს, მათ შორის ერთი პოლიციელზე თავდასხმისთვის.