აშშ-ის პრეზიდენტმა დონალდ ტრამპმა განაცხადა, რომ ირანთან საომარი მოქმედებების დასრულების შესახებ შეთანხმება უკვე გაფორმებულია. ტრამპის თქმით, დოკუმენტი ძალზე მნიშვნელოვანია და მისი დეტალები საზოგადოებისთვის უახლოეს ხანში გახდება ცნობილი.

EPA

G7-ის სამიტზე საფრანგეთის პრეზიდენტ ემანუელ მაკრონთან საუბრისას, ტრამპმა დაადასტურა, რომ შეთანხმება ხელმოწერილია. აშშ-ის მაღალჩინოსნების ინფორმაციით, დოკუმენტს ელექტრონული ხელმოწერით დაადასტურეს თავად დონალდ ტრამპმა, ვიცე-პრეზიდენტმა ჯეი დი ვენსმა და ირანის პარლამენტის სპიკერმა მოჰამად ბაღერ ღალიბაფმა.

შეთანხმების ფარგლებში, პარასკევს, ჟენევაში ფორმალური პროცედურების დასრულებისთანავე, ჰორმუზის სრუტე გაიხსნება. პრეზიდენტმა უკვე გასცა განკარგულება ირანის პორტების საზღვაო ბლოკადის მოხსნის შესახებ. სოციალურ ქსელში ტრამპმა აღნიშნა, რომ სრუტეში გემების მოძრაობა უკვე განახლდა.

შეთანხმება ითვალისწინებს ცეცხლის შეწყვეტის რეჟიმის 60 დღით გახანგრძლივებას, რა დროსაც მხარეები საბოლოო შეთანხმების პირობებზე იმუშავებენ. პაკისტანის პრემიერ-მინისტრ შეჰბაზ შარიფის განცხადებით, რომელიც მოლაპარაკებებში შუამავლის როლს ასრულებდა, დოკუმენტი სამხედრო ოპერაციების, მათ შორის ლიბანში, მყისიერ და მუდმივ შეწყვეტას ითვალისწინებს.

აშშ-ის ადმინისტრაცია აცხადებს, რომ ირანის ბირთვული პროგრამის საკითხი შეთანხმების განუყოფელი ნაწილია. ირანის მიერ ნაკისრი ვალდებულებების შესრულების შემთხვევაში, შესაძლებელი გახდება სანქციების შემსუბუქება. თუმცა, ისრაელის პრემიერ-მინისტრი ბენიამინ ნეთანიაჰუ აცხადებს, რომ ისრაელი შეინარჩუნებს უსაფრთხოების ზონებს ლიბანში, სირიასა და ღაზაში და იტოვებს უფლებას, იმოქმედოს საკუთარი უსაფრთხოებისთვის, მიუხედავად შეთანხმებისა.

ირანის საგარეო საქმეთა სამინისტრომ აღნიშნა, რომ მიუხედავად ხელმოწერილი დოკუმენტისა, თეირანი კვლავ ინარჩუნებს უნდობლობას შეერთებული შტატების მიმართ და ამ შეთანხმებას მხოლოდ დაძაბულობის შემცირებისკენ გადადგმულ ნაბიჯად მიიჩნევს.