აშშ-ს წარმომადგენელთა პალატამ უცხოური სათვალთვალო პროგრამის, FISA-ს 702-ე ნაწილის, მოქმედების ვადის გაგრძელების ინიციატივა ჩააგდო. კენჭისყრის შედეგად, რომელიც 198 ხმით 218-ის წინააღმდეგ დასრულდა, პროგრამა პარასკევს ოფიციალურად წყვეტს ფუნქციონირებას.

პროცესის ჩავარდნის მთავარი მიზეზი პრეზიდენტ დონალდ ტრამპის გადაწყვეტილებაა, რომელმაც ეროვნული დაზვერვის დირექტორის მოვალეობის შემსრულებლად ბილ პალტე წარადგინა. პალტე ამჟამად ფედერალური საბინაო ფინანსების სააგენტოს ხელმძღვანელია და მოკლებულია ეროვნული უსაფრთხოების სფეროში მუშაობის გამოცდილებას.

დემოკრატიული პარტიის ლიდერები აცხადებენ, რომ არ დაუჭერენ მხარს პროგრამის გაგრძელებას, სანამ არ განხორციელდება რეფორმები, რომლებიც დაიცავს როგორც ეროვნულ უსაფრთხოებას, ისე ამერიკელთა კონსტიტუციურ უფლებებს. მათთვის პალტეს დანიშვნა კანონის დარღვევაა, რადგან დირექტორს უნდა გააჩნდეს „ვრცელი“ გამოცდილება უსაფრთხოების სექტორში.

სპიკერმა მაიკ ჯონსონმა დემოკრატების ქმედება გააკრიტიკა და აღნიშნა, რომ ეს გადაწყვეტილება ქვეყანას სერიოზული საფრთხის წინაშე აყენებს. განსაკუთრებით საყურადღებოა ის ფაქტი, რომ აშშ-ში ფეხბურთის მსოფლიო ჩემპიონატის დაწყება და სხვადასხვა საიუბილეო ღონისძიებებია დაგეგმილი, სადაც დაზვერვის მონაცემები უსაფრთხოების უზრუნველსაყოფად კრიტიკულად მნიშვნელოვანია.

თავად დონალდ ტრამპმა სოციალურ ქსელში დაწერა, რომ პროგრამა აუცილებელია სამხედრო ძალებისა და მოსახლეობის უსაფრთხოებისთვის. მან მოუწოდა კონგრესს, მიიღონ დროებითი გაგრძელება, რათა დრო დარჩეს უწყების მუდმივი ხელმძღვანელის შერჩევისა და დამტკიცებისთვის.

სენატის დაზვერვის კომიტეტის წამყვანი დემოკრატი მარკ უორნერი აფრთხილებს, რომ პროგრამის ვადის ამოწურვა საშიშია. თუმცა, ის არ გამორიცხავს ალტერნატიულ გზებს, მათ შორის პრეზიდენტის მიერ აღმასრულებელი ბრძანების გამოცემას, თუმცა ამ ნაბიჯის იურიდიული მხარე და სატელეკომუნიკაციო კომპანიების მხრიდან შესაძლო წინააღმდეგობა კვლავ გაურკვეველია.

პროგრამის შეწყვეტა ქმნის სამართლებრივ ვაკუუმს, რამაც შეიძლება შეაფერხოს უცხოელი აქტორების კომუნიკაციების მონიტორინგი. კანონმდებლები ამ საკითხს ივნისის ბოლომდე, სავარაუდოდ, ვეღარ მიუბრუნდებიან, რადგან წარმომადგენელთა პალატა 23 ივნისამდე მუშაობას წყვეტს.