SpaceX-ის აქციებმა ვაჭრობის პირველი სრული დღე 20%-იანი ზრდით დაასრულა. ეს მას შემდეგ მოხდა, რაც გასულ პარასკევს კომპანიამ საფონდო ბირჟაზე ისტორიაში ყველაზე მასშტაბური IPO განახორციელა.

Nasdaq-ზე ვაჭრობის პროცესში დაახლოებით 244 მილიონი აქცია გაიცვალა. პარასკევის სესიის განმავლობაში კი მოცულობამ 500 მილიონს გადააჭარბა, რითაც კომპანია 2012 წელს Facebook-ის მიერ დაფიქსირებულ მაჩვენებელს მიუახლოვდა.

კომპანიის აქციები 135 დოლარად იყო შეფასებული, თუმცა პარასკევს ვაჭრობა 161 დოლარის ნიშნულზე დასრულდა. ორშაბათისთვის ფასმა კიდევ 31 დოლარით მოიმატა და 192.50 დოლარი შეადგინა. შედეგად, SpaceX-ის საბაზრო კაპიტალიზაცია 2 ტრილიონ დოლარზე მეტია.

ილონ მასკი საკუთარ სოციალურ ქსელ X-ზე წერს, რომ კომპანიამ 2030 წლისთვის შესაძლოა 1 ტრილიონი დოლარის შემოსავალს მიაღწიოს. შედარებისთვის, გასულ წელს SpaceX-ის შემოსავალი 18.7 მილიარდი დოლარი იყო. მასკის თქმით, მას გაუკვირდება, თუ ეს მაჩვენებელი 2031 წელს 1 ტრილიონ დოლარზე ნაკლები იქნება.

კრიტიკა და შეფასებები

მიუხედავად ოპტიმისტური მოლოდინებისა, ფინანსური ანალიტიკოსები გაყოფილი არიან. CFRA-მ აქციებს „გაყიდვის“ რეკომენდაცია მიანიჭა და 12-თვიანი სამიზნე ფასი 115 დოლარად განსაზღვრა, რაც არსებულ ფასთან შედარებით 29%-იან ვარდნას ნიშნავს.

ანალიტიკოსები მიუთითებენ კაპიტალის მაღალ ხარჯებზე. მარტში დასრულებული სამი თვის განმავლობაში SpaceX-მა 10.1 მილიარდი დოლარი დახარჯა, რაც გასული წლის ანალოგიურ პერიოდთან შედარებით 4.1 მილიარდით მეტია. თანხების უდიდესი ნაწილი ხელოვნური ინტელექტის განვითარებას მოხმარდა.

Bayes Business School-ის ლექტორი პაულინა როშკოვსკა აცხადებს, რომ ინვესტორებს პოეზიის ნაცვლად კონკრეტული ფინანსური შედეგები სჭირდებათ. მან აღნიშნა, რომ IPO-ს პროსპექტში მმართველობითი რისკები დეტალურად არ არის გაწერილი.

მეორე მხრივ, NewStreet Research-ის ანალიტიკოსი ჯეიმს რატზერი უფრო ოპტიმისტურია. მისი თქმით, SpaceX-ს კონკურენტებთან შედარებით სულ მცირე 10-წლიანი უპირატესობა აქვს რაკეტების გაშვების შესაძლებლობებში. რატზერი მიიჩნევს, რომ კომპანიის გრძელვადიანი ხედვა, მათ შორის Starship-ის პროექტი და ორბიტალური მონაცემთა ცენტრები, ამართლებს ასეთ მაღალ შეფასებას 20-25 წლიან პერსპექტივაში.