ცენტრალური საარჩევნო კომისია (ცესკო) საარჩევნო ადმინისტრაციების მეცამეტე საერთაშორისო კონფერენციას მასპინძლობს. წელს შეხვედრის მთავარი თემა დეზინფორმაციის სტრატეგიები, ხელოვნური ინტელექტი და სოციალური ქსელების გავლენაა ინფორმაციის სანდოობის უზრუნველყოფის პროცესზე.

კონფერენცია ცესკოს თავმჯდომარემ, გიორგი კალანდარიშვილმა გახსნა. ღონისძიებას ესწრებიან საქართველოს პარლამენტის წევრები, სახალხო დამცველი და კომუნიკაციების კომისიის თავმჯდომარე. მონაწილეები ორი დღის განმავლობაში იმსჯელებენ იმ მექანიზმებზე, რომლებიც დემოკრატიული ღირებულებების დასაცავად არის საჭირო.

ციფრული ეპოქის გამოწვევები

გიორგი კალანდარიშვილის განცხადებით, თანამედროვე ტექნოლოგიებმა ინფორმაციის გავრცელების პროცესი რადიკალურად შეცვალა. მისი თქმით, ხელოვნური ინტელექტი მოქალაქეთა ჩართულობისთვის ახალ შესაძლებლობებს ქმნის, თუმცა, ამავდროულად, ზრდის მანიპულაციისა და საზოგადოებრივ აზრზე ზემოქმედების რისკებს.

3 ფოტო — დააჭირე გასადიდებლად

„მნიშვნელოვანია, რომ საარჩევნო ადმინისტრაციებმა და სახელმწიფო ინსტიტუტებმა ერთობლივად იმსჯელონ ამ გამოწვევებზე. ჩვენი მიზანია შევიმუშაოთ ეფექტიანი მიდგომები ინფორმაციული სანდოობის დასაცავად“, - აღნიშნა კალანდარიშვილმა გახსნის სიტყვაში.

საერთაშორისო გამოცდილების გაზიარება

17-18 ივნისს დაგეგმილ კონფერენციაში 23 ქვეყნის საარჩევნო ადმინისტრაციის წარმომადგენელი მონაწილეობს. მათ შორის არიან ისეთი საერთაშორისო ორგანიზაციები და ტექნოლოგიური კომპანიები, როგორებიცაა A-WEB და Smartmatic.

დისკუსიების ფარგლებში მონაწილეები განიხილავენ დეზინფორმაციის გავლენას არჩევნებზე, პოლიტიკურ გამოწვევებს და განათლების როლს ყალბი ინფორმაციის წინააღმდეგ ბრძოლაში. კონფერენცია მიზნად ისახავს საერთაშორისო პროფესიული ქსელის გაძლიერებას, რომელიც ურთიერთნდობასა და საერთო პასუხისმგებლობაზეა დაფუძნებული.