აშშ-ის პრეზიდენტი დონალდ ტრამპი მიმდინარე წლის ივლისში თურქეთში დაგეგმილ ნატო-ს სამიტში მონაწილეობას მიიღებს. ინფორმაციას აშშ-ის სახელმწიფო მდივანი მარკო რუბიო ადასტურებს.

წარმომადგენელთა პალატის საგარეო ურთიერთობათა კომიტეტში გამოსვლისას, რუბიომ ხაზგასმით აღნიშნა, რომ მიუხედავად დონალდ ტრამპის მხრიდან ალიანსის მიმართ გამოთქმული პრეტენზიებისა და გარკვეული უკმაყოფილებისა, პრეზიდენტი შეხვედრას არ გამოაკლდება.

3 ფოტო — დააჭირე გასადიდებლად

„შეერთებული შტატები კვლავ ნატო-ს წევრია და ჩვენ თურქეთში ვიქნებით, რათა ყველა ის საკითხი განვიხილოთ, რაც დღის წესრიგში დგას. პრეზიდენტი პირადად დაესწრება ნატო-ს ლიდერთა მომდევნო შეხვედრას, სადაც არსებული უთანხმოებები დაზუსტდება“, — განაცხადა მარკო რუბიომ.

ტრამპის მონაწილეობა მოახლოებულ სამიტში მნიშვნელოვანი სიგნალია ალიანსის ერთიანობისთვის. მიუხედავად ვაშინგტონსა და ნატო-ს წევრ სხვა ქვეყნებს შორის არსებული დაძაბულობისა, აშშ-ის ადმინისტრაცია დიალოგის გაგრძელებას ადასტურებს.

თურქეთში დაგეგმილი სამიტი ერთ-ერთი გადამწყვეტი პლატფორმა იქნება იმ საკითხების მოსაგვარებლად, რომლებიც აშშ-ის პრეზიდენტის შეფასებით, რეფორმირებას ან გადახედვას საჭიროებს.