5 ივნისს, გარემოს დაცვის მსოფლიო დღესთან დაკავშირებით, თბილისის დედაენის ბაღი მრავალფეროვან შემეცნებით და გასართობ აქტივობებს დაეთმო. ღონისძიებას გარემოს დაცვისა და სოფლის მეურნეობის მინისტრის პირველი მოადგილე ნინო თანდილაშვილი დაესწრო.

ღონისძიების ფარგლებში, დაცული ტერიტორიების სააგენტოს ეკოსაგანმანათლებლო პროექტის „ვიცავ ჩემი ქვეყნის ბუნებას“ გამარჯვებული მოსწავლეები დააჯილდოვეს. მათ სერტიფიკატები და სიმბოლური საჩუქრები გადაეცათ.

„გარემოს დაცვის დღის მთავარი მიზანია, შევახსენოთ საზოგადოებას, რამდენად მნიშვნელოვანია ჩვენი საერთო საცხოვრებელი გარემოს დაცვა. ჯანსაღი გარემო პირდაპირ განსაზღვრავს ადამიანების ჯანმრთელობასა და ცხოვრების ხარისხს“, — განაცხადა ნინო თანდილაშვილმა.

დღის განმავლობაში დედაენის ბაღში სპეციალური თემატური სივრცეები იყო მოწყობილი. გარემოსდაცვითი ინფორმაციისა და განათლების ცენტრის ორგანიზებით, დამსწრეები მონაწილეობდნენ ვიქტორინებსა და გასართობ თამაშებში. სტუმრებისთვის გაიმართა მუსიკალური პროგრამა და ანიმატორების წარმოდგენები.

3 ფოტო — დააჭირე გასადიდებლად

სამინისტროს სისტემაში შემავალმა უწყებებმა, მათ შორის ეროვნულმა სატყეო სააგენტომ, დაცული ტერიტორიების სააგენტომ და გარემოს ეროვნულმა სააგენტომ, საკუთარ კუთხეებში გარემოსდაცვითი საქმიანობა წარმოაჩინეს. პატარებს შესაძლებლობა ჰქონდათ, საკუთარი ხელით დაერგოთ ელდარის ფიჭვის ნერგები.

ერთ-ერთი გამორჩეული აქტივობა იყო ინტერაქტიული ინსტალაცია „მწვანე პლანეტის კედელი“, სადაც მონაწილეები ტოვებდნენ გზავნილებს თემაზე: „როგორი მინდა იყოს ჩემი პლანეტა“. დღის განმავლობაში ასევე გაიმართა კლიმატის ცვლილებასთან ადაპტაციის საქართველოს ეროვნული გეგმის (NAP) პროექტის გახსნითი ღონისძიება.

გარემოს დაცვის მსოფლიო დღე 1972 წლიდან, გაეროს გენერალური ასამბლეის ინიციატივით აღინიშნება. 2026 წლის გზავნილია: „ბუნებით შთაგონებული. კლიმატისთვის. ჩვენი მომავლისთვის“.