ჟურნალისტი გოჩა მირცხულავა საზოგადოებაში მიმდინარე პროცესებსა და სამართალდამცავთა ქმედებებს მკაცრად აფასებს. მირცხულავას განცხადებით, ის, რაც საპროტესტო აქციების ფონზე ხდება, ცალკეული შემთხვევები კი არა, სისტემური ხასიათის დანაშაულია.

სისტემური დანაშაულის ნიშნები

ჟურნალისტი იხსენებს აქციებიდან გაქცეული მოქალაქეების მიმართ განხორციელებულ ქმედებებს და მათ „კაციჭამია ვირთხებს“ უწოდებს. მისი თქმით, ეს არ იყო უბრალო ძალის გადამეტება, არამედ მიზანმიმართული ქმედება, რომელმაც საზოგადოების მორალური ფასეულობები შეარყია.

მირცხულავას აზრით, ბოლო 14 წელიწადმა ახალი სახეობა შექმნა, რომელიც აბსოლუტურად მოწყვეტილია ადამიანურ ღირებულებებს. იგი აღნიშნავს, რომ პოლიციელთა დიდი ნაწილი, ვინც დღეს მსგავს ქმედებებში მონაწილეობს, გასული წლების განმავლობაში ჩამოყალიბდა.

„მორალური დეგრადაცია“

მირცხულავა ხაზს უსვამს მორალურ კრიზისს და აღნიშნავს, რომ ეს პროცესი მხოლოდ პოლიციურ ინსტიტუციებს არ ეხება. მისი შეფასებით, პრობლემა გაცილებით ღრმაა და ქვეყნის ფუნდამენტურ ღირებულებებს აზიანებს.

„დამნაშავესაც აქვს უფლება. ეს ცემა არ იყო და არც ძალის გადამეტება. ახლა ამათ დედები და ცოლები საჭმელს აჭმევენ სახლში. ცოლები და შვილები მიეფერებიან. ძმაკაცები ჭიქას მიუჭახუნებენ და ესენი კიდევ საქართველოს სადღეგრძელოს დალევენ“, – აცხადებს ჟურნალისტი.

მისივე თქმით, ის ადამიანები, რომლებიც წარსულში მსგავსი ტიპის ძალადობას აპროტესტებდნენ, დღეს დუმილს ამჯობინებენ, რაც თავისთავად კონფორმიზმისა და მორალური დეგრადაციის ნიშანია.

ჟურნალისტი კითხვებს სვამს იმ ადამიანების წარმომავლობასა და აღზრდაზე, რომლებიც ძალადობრივ ქმედებებს ახორციელებენ. მირცხულავას თქმით, ეს არის სისტემა, რომელმაც „კაციჭამია ვირთხები“ გამოზარდა და დღეს ეს ადამიანები ქვეყნის მართვის პროცესშიც კი მონაწილეობენ.