„ჰადსონის ინსტიტუტის“ პრეზიდენტი ჯონ უოლტერსი საქართველოს პრემიერ-მინისტრის, ირაკლი კობახიძის განცხადებას გამოეხმაურა. საპასუხო წერილში, რომელიც უოლტერსმა სოციალურ ქსელ X-ზე გამოაქვეყნა, ის ხაზგასმით აღნიშნავს, რომ ინსტიტუტი სრულად დგას საკუთარი კვლევისა და დასკვნების უკან.

კონფლიქტის მიზეზი ირანის მზარდი გავლენის შესახებ მომზადებული კვლევა გახდა, რომლის თანაავტორებიც გიორგი კანდელაკი და ლუკ კოფი არიან. პრემიერ-მინისტრმა კობახიძემ კანდელაკი „აგენტურაში“ და „ღალატის ფორმულაში“ დაადანაშაულა და მის წინააღმდეგ სამართლებრივი რეაგირების აუცილებლობაზე მიანიშნა.

„ფაქტები მუქარით არ იცვლება“

ჯონ უოლტერსმა მკაცრი პასუხი გასცა პრემიერის რიტორიკას. მისი თქმით, „ჰადსონის ინსტიტუტი“ არის ის ორგანიზაცია, რომელმაც აღნიშნული ანგარიში გამოსცა და ის პასუხისმგებლობას იღებს დოკუმენტში მოყვანილ ყველა ფაქტზე.

„პატივცემულო, ბატონო კობახიძე, ამ ანგარიშის გამომცემელი „ჰადსონის ინსტიტუტია“. როგორც პრეზიდენტი, მე ამ კვლევისა და დასკვნების უკან ვდგავარ. ფაქტები მუქარით არ იცვლება. თქვენ არ ხართ „ქართული ოცნება“ – თქვენ ქართული ოცნებების გამანადგურებელი ხართ“, – წერს უოლტერსი.

პრემიერ-მინისტრმა თავის მხრივ განაცხადა, რომ ქვეყანაზე „ახალი პატარა ტალღაა“ წამოსული, რომელშიც კონკრეტული პირები არიან ჩართულნი. მისი თქმით, გიორგი კანდელაკის წარსული საქმიანობა ცნობილია და შესაბამისმა სახელმწიფო უწყებებმა შესაძლოა საკითხი სამართლებრივად განიხილონ.

კვლევა ირანის გავლენის შესახებ

„ჰადსონის ინსტიტუტის“ ანგარიში, რომელიც დაპირისპირების ეპიცენტრში მოექცა, საქართველოში ირანის გავლენის ზრდას ეხება. სწორედ ამ კვლევამ გამოიწვია საქართველოს ხელისუფლების უკმაყოფილება, რაც კობახიძის მწვავე განცხადებებში აისახა.

პრემიერი მიიჩნევს, რომ მსგავსი ანგარიშები მიზანმიმართულ თავდასხმას წარმოადგენს როგორც ხელისუფლებაზე, ისე ქართველ ხალხზე. თუმცა, საერთაშორისო ორგანიზაციის პრეზიდენტის პოზიცია ადასტურებს, რომ კვლევის ავტორები პოლიტიკურ წნეხს არ ექვემდებარებიან.

ამ ეტაპზე უცნობია, მოჰყვება თუ არა ირაკლი კობახიძის განცხადებას რეალური სამართლებრივი ნაბიჯები გიორგი კანდელაკის წინააღმდეგ. მთავრობის მეთაურმა აღნიშნა, რომ ეს უშუალოდ „შესაბამისი უწყებების“ კომპეტენციაა.