საპარლამენტო უმრავლესობის ლიდერი და ფრაქცია „ქართული ოცნების“ თავმჯდომარე ირაკლი კირცხალია ოპოზიციის ნაწილის მიერ გამართულ პოლიტიკურ პერფორმანსებს ეხმაურება. ტელეკომპანია „იმედის“ ეთერში საუბრისას კირცხალიამ აღნიშნა, რომ რუბიოს მოლოდინში მყოფი ადამიანების ქცევა ქვეყნის ინტერესებს აცდენილია.

კირცხალიას თქმით, ეს ქმედებები „მონური სულის“ პირდაპირი გამოვლინებაა. მან ყურადღება გაამახვილა იმ ფაქტზე, რომ ოპოზიციის წარმომადგენლები, რომლებიც წარსულში აშშ-ის პრეზიდენტს შეურაცხმყოფელი ტერმინებით მოიხსენიებდნენ, ახლა უცხოელი პოლიტიკოსის ვიზიტს დიდი ენთუზიაზმით ხვდებიან.

„დაქრინჯვა“ და პოლიტიკური კულტურა

უმრავლესობის ლიდერმა აღნიშნა, რომ მსგავსი პოლიტიკური პერფორმანსები თავმოყვარე ქვეყანაში მიუღებელია. მისი თქმით, ეს არის მოვლენა, როდესაც სხვისი საქციელის გამო ადამიანს უხერხულობის გრძნობა ეუფლება.

„ახალგაზრდა თაობას აქვს სიტყვა - დაქრინჯვა. ეს არის საქციელი, როდესაც სხვის მაგივრად გრცხვენია. ნებისმიერი უცხო ქვეყნის წარმომადგენლის მიმართ ასეთ დამოკიდებულებას ღიად რომ ავლენენ, თავმოყვარე ადამიანს ეუფლება გრძნობა, რომ მათ მაგივრად რცხვენია“, - განაცხადა კირცხალიამ.

მისივე შეფასებით, ოპოზიციის დიდი ნაწილი „კარგად გამოწვრთნილი და სისხლგამოცლილი აგენტია“, რომელთაც დამოუკიდებლად მოქმედების უნარი არ გააჩნიათ. კირცხალიას მტკიცებით, მათთვის თავისუფლება უცხო ცნებაა.

საგარეო პოლიტიკური ვექტორები

საუბრისას ირაკლი კირცხალიამ შეეხო აშშ-სა და ჩინეთთან ურთიერთობის საკითხებსაც. მან ხაზი გაუსვა, რომ საქართველოს ხელისუფლება მზადაა აშშ-სთან ურთიერთობა პარიტეტულ, ღირსეულ საწყისებზე და „ახალი ფურცლით“ განაგრძოს.

პარალელურად, კირცხალიამ ისაუბრა ჩინეთთან სტრატეგიული პარტნიორობის მნიშვნელობაზე. მისი განმარტებით, შუა დერეფნის კონტექსტში, საქართველოსთვის პრაგმატული ურთიერთობები როგორც ჩინეთთან, ისე აშშ-სთან, ქვეყნის ეროვნული ინტერესების ნაწილია.

„ჩინეთთან სტრატეგიული პარტნიორობა წლიდან წლამდე ახალ სიმაღლეზე ადის. როდესაც ვართ შუა დერეფნის საკვანძო ქვეყანა, როგორ წარმოგიდგენიათ, რომ არ გვქონდეს პრაგმატული ურთიერთობები მსოფლიოს წამყვან ეკონომიკებთან“, - განაცხადა მან.