Ripple Labs კრიპტოვალუტის ბაზარზე ახალ, ამბიციურ ნაბიჯს დგამს. Bloomberg-ის ინფორმაციით, კომპანია მუშაობს საჯარო ბაზრისთვის განკუთვნილ საინვესტიციო ინსტრუმენტზე, რომლის მიზანიც XRP-ის აქტივების დაგროვებაა. გეგმის ფარგლებში, Ripple-ს სურს, სულ მცირე, 1 მილიარდი დოლარის კაპიტალი მოიზიდოს.

როგორ იმუშავებს ახალი მექანიზმი?

პროექტი სპეციალური დანიშნულების სააქციო კომპანიის (SPAC) მეშვეობით განხორციელდება. ინვესტორებისგან მიღებული სახსრები ახალ ციფრულ საგანძურში განთავსდება. მოსალოდნელია, რომ Ripple თავად გახდება პროექტის ერთ-ერთი მთავარი მხარდამჭერი და ფონდში საკუთარ რეზერვებში არსებულ XRP-ს შეიტანს.

ამჟამად მხარეებს შორის მოლაპარაკებები ჯერ კიდევ გრძელდება და პირობები შესაძლოა შეიცვალოს. Ripple-ს ოფიციალური კომენტარი ამ ეტაპზე არ გაუკეთებია.

XRP და კრიპტო-ტრეზერების ბაზარი

თუ გარიგება შედგება, ეს XRP-ის ისტორიაში ყველაზე მასშტაბური საგანძური ფონდი იქნება. მსოფლიოს მეხუთე უმსხვილესი კრიპტოვალუტა, რომლის საბაზრო კაპიტალიზაციაც 138 მილიარდ დოლარს შეადგენს, მიმდინარე წელს 13%-ით გაიზარდა.

ციფრული აქტივების საგანძური კომპანიები 2025 წელს კრიპტოსამყაროს ერთ-ერთ მთავარ ტრენდად იქცა. კომპანიები იყენებდნენ SPAC-ებსა და აქციების ემისიას ბალანსზე კრიპტოვალუტის განსათავსებლად. თუმცა, ბაზრის ცვალებადობამ ამ სტრატეგიის ეფექტიანობა შეასუსტა, რამაც ბევრ მსგავს ფონდს ფასები შეუმცირა.

რატომ არის ეს მნიშვნელოვანი?

Ripple-სთვის ეს ინიციატივა ორმაგი დანიშნულებისაა. ერთი მხრივ, ეს არის XRP-ის მყიდველთა ახალი ფენა, მეორე მხრივ კი — კომპანიის საკუთრებაში არსებული აქტივების კაპიტალიზაციის გზა. კომპანიის ვებგვერდის მონაცემებით, Ripple-ის საფულეებში 4,74 მილიარდი XRP ინახება, ხოლო 35,9 მილიარდი მონეტა ექსქროუ (escrow) ანგარიშებზეა დაბლოკილი.

ეს ნაბიჯი პასუხს გასცემს კითხვას, აქვს თუ არა XRP-ს საკმარისი ინსტიტუციური მხარდაჭერა იმისთვის, რომ ბიტკოინის მსგავსი ფინანსური სტრუქტურები შექმნას. აქამდე, VivoPower-ის მაისის განცხადება, 121 მილიონი დოლარის მობილიზების შესახებ, ერთ-ერთი ყველაზე ხმამაღალი მაგალითი იყო ამ მიმართულებით.