საქართველოში ჯაშუშობის ბრალდებით დაკავებული გულბაათ რცხილაძე და ირაკლი ჩიხლაძე წარდგენილ ბრალდებებს კატეგორიულად უარყოფენ. 30 მაისს დაკავებულმა პირებმა ბრალდების მხარის პოზიცია არ გაიზიარეს, მათი ადვოკატები კი საქმეში არსებულ მტკიცებულებებს დაუსაბუთებელს უწოდებენ.

გულბაათ რცხილაძის დაცვის მხარის განცხადებით, მართალია, გამოძიება მიმდინარეობს სისხლის სამართლის კოდექსის კონკრეტული მუხლით, თუმცა ამ ეტაპზე რთულია იმის დადასტურება, თუ რომელი ქვეყნის სასარგებლოდ ჯაშუშობაში ადანაშაულებენ მას. რცხილაძე საკუთარ დაკავებას მის მიერ დაფუძნებულ „რუსოფობიის მონიტორინგის საბჭოს“ და საჯარო აქტივობებს უკავშირებს.

ადვოკატის თქმით, რცხილაძე აცხადებს, რომ მისი საქმიანობა რუსეთსა და საქართველოს შორის ურთიერთობების ნორმალიზებას ისახავდა მიზნად. მანამდე, 2025 წელს, გამოცემა „What Fact“-მა გამოაქვეყნა კვლევა, რომელშიც რცხილაძის ორგანიზაციების კრემლთან დაკავშირებულ „Pravfond“-თან კავშირებზე იყო საუბარი.

პარალელურად, ჯაშუშობის ბრალდებას აბსურდულს უწოდებს ირაკლი ჩიხლაძის ადვოკატი გიორგი გელხაური. ჩიხლაძე „კავკასიის ადამიანის უფლებათა ინსტიტუტისა“ და „კავკასიის სამოქალაქო მოსმენების ცენტრის“ დამფუძნებელია და ცნობილია რეგიონული კონფლიქტების საკითხებზე გამართული დისკუსიებით.

ადვოკატის განმარტებით, ჩიხლაძის საქმესა და რცხილაძის საქმეს შორის არანაირი კავშირი არ არსებობს. ისინი მხოლოდ ერთი და იმავე მუხლით მიმდინარე გამოძიების ფარგლებში არიან დაკავებულნი. გელხაურის თქმით, საქმის მასალები არ შეიცავს რაიმე მტკიცებულებას, რომელიც ჩიხლაძის მხრიდან ჯაშუშურ საქმიანობაზე ან ქვეყნის ინტერესების წინააღმდეგ მიმართულ ქმედებებზე მიუთითებდეს.

სახელმწიფო უსაფრთხოების სამსახურის მტკიცებით, დაკავებულები წლების განმავლობაში ფარულ მეთოდებს, დაშიფრულ კომუნიკაციას და უცხო ქვეყნების წარმომადგენლებთან სისტემატურ კონტაქტებს იყენებდნენ. ორივე საქმე სისხლის სამართლის კოდექსის 314-ე მუხლით მიმდინარეობს, რაც 8-დან 12 წლამდე პატიმრობას ითვალისწინებს.