ლაგოდეხის მუნიციპალიტეტში სამელიორაციო ინფრასტრუქტურის მოწესრიგება აქტიურად მიმდინარეობს. შპს „საქართველოს მელიორაციამ“ სოფელ საქობოს ტერიტორიაზე კართუბნის სამელიორაციო არხის გაწმენდითი სამუშაოები დაასრულა. პროექტის ფარგლებში, კოლექტორის 1000-მეტრიანი მონაკვეთი დანალექი გრუნტისა და ბალახეული საფარისგან გათავისუფლდა.

აღნიშნულ მონაკვეთზე წყლის თავისუფალი გადაადგილება შეფერხებული იყო, რაც ადგილობრივებისთვის სერიოზულ პრობლემას წარმოადგენდა. არხში დაგროვილი ნატანი მასის გამო, უხვი ნალექის პერიოდში არხი სრულად ივსებოდა, რის შედეგადაც მიმდებარედ არსებული სასოფლო-სამეურნეო სავარგულების დატბორვის მაღალი რისკი არსებობდა.

3 ფოტო — დააჭირე გასადიდებლად

სამუშაოების შედეგად, არხის გამტარუნარიანობა მნიშვნელოვნად გაუმჯობესდა. ეს ცვლილება პირდაპირ აისახება სოფლის მეურნეობის განვითარებაზე, რადგან ფერმერებს საკუთარი მიწის ნაკვეთების დატბორვის საფრთხე აღარ ემუქრებათ.

სამელიორაციო სისტემების გამართული ფუნქციონირება ლაგოდეხის მსგავს აგრარულ რეგიონებში კრიტიკულად მნიშვნელოვანია მოსავლის სტაბილურობისთვის. ინფრასტრუქტურული პროექტი მიზნად ისახავს საირიგაციო ქსელების ეფექტურობის ზრდას და აგროსექტორისთვის ხელსაყრელი გარემოს შექმნას.